Putin-i pretendon fitore në zgjedhjet e kontrolluara prej Kremlinit

18 Mars 2024, 09:22, Kosova & Bota CNA

Putin-i pretendon fitore në zgjedhjet e kontrolluara prej Kremlinit

Vladimir Putin

Presidenti rus, Vladimir Putin, e ka fituar një mandat të pestë në pushtet, në një proces zgjedhor tejet të kontrolluar, teksa synon të shpërfaqë mbështetjen e popullit për luftën në Ukrainë dhe për politikat gjithnjë e më shtypëse.

Putin-i, 71-vjeçar, i cili ka udhëhequr si president ose si kryeministër që prej vitit 2000, pritet të tejkalojë udhëheqësinë gati 30-vjeçare të Josef Stalin-it, kur ta përfundojë këtë mandat të ri.

Kështu, Putin-i do të bëhet lideri që ka udhëhequr më së gjati në Rusi në më shumë se dy shekuj.

Pas 99.68 për qind të votave të numëruara, Putin-i është thënë të ketë fituar 87.32 për qind të votave – shifër rekord pas rënies së Bashkimit Sovjetik.

Komiteti Qendror Zgjedhor ka thënë që më shumë se 70 për qind e popullsisë e ka shfrytëzuar të drejtën e votës përgjatë tri ditëve të zgjedhjeve.

Votimet e mbajtura më 15-17 mars janë të parat për Putin-in, prej nisjes së luftës në Ukrainë, më 2022-shin, e cila ka lënë të vrarë mijëra shtetas rusë, ua ka vështirësuar jetën dhjetëra mijëra të tjerëve, dhe i ka shkëputur gati krejtësisht lidhjet me Perëndimin.

Në mbajtjen e këtyre zgjedhjeve, që konsiderohen të manipuluara, Putin-i dëshiron të tregojë se e ka mbështetjen e plotë të popullit, kanë thënë ekspertët.

Synimi i Kremlinit “është që të ketë mbështetje për luftën e Rusisë në Ukrainë. Ideja është që miliona rusë t’i miratojnë vendimet e Putin-it, që janë bërë në dy vjetët e fundit”, ka thënë Maksim Trudolyubov, hulumtues i lartë në Institutin Kennan, në një shkrim para zgjedhjeve.

Në disa deklarata të bëra pak pas shpalljes së fitores së tij, Putin-i ka thënë se zgjedhjet kanë treguar se kombi është “një ekip”.

Në këto zgjedhje Putin-i ka garuar me tre bura të panjohur, politikanë të afërt me Kremlinin, fushatat zgjedhore të të cilëve kanë qenë pak të vërejtshme.

Vëzhguesve të pavarur u është pamundësuar pjesëmarrja në zgjedhje, për herë të parë në historinë postsovjetike, kanë thënë ekspertët.

Votimet janë mbajtur edhe në territoret ukrainase të pushtuara prej Rusisë, ku gjenden qindra mijëra ushtarë rusë.

Shtetet e Bashkuara kanë thënë se këto zgjedhje nuk kanë qenë as të lira, as të drejta./REL