Mynih/ Mbyllet për herë të dytë në 24 orë aeroporti, dyshohet për dronë

4 Tetor 2025, 10:50, Kosova & Bota CNA

Mynih/ Mbyllet për herë të dytë në 24 orë

Aeroporti i Mynihut në Gjermani ka ndaluar fluturimet për herë të dytë brenda 24 orëve, pas dyshimeve të pakonfirmuara të dronëve.

Në një deklaratë mbrëmë në darkë, aeroporti tha se fluturimet u pezulluan në orën 21:30 me atë vendase, me rreth 6,500 pasagjerë të prekur.

Të paktën 17 fluturime u anuluan gjithashtu në Mynih të enjten në mbrëmje për shkak se ishin parë shumë dronë në hapësirën ajrore aty pranë.

Ky është incidenti i fundit në një seri incidentesh që përfshijnë dronë që kanë ndërprerë aviacionin në Europë në javët e fundit.

Po ashtu, autoritetet në Belgjikë të enjten po hetonin alarmet për 15 dronë, të cilët u panë mbi bazën ushtarake Elsenborn pranë kufirit gjerman, sipas raportimeve të mediave belge.

Pasi u panë, dronët thuhet se fluturuan nga Belgjika në Gjermani, ku u vëzhguan edhe nga policia në qytetin e vogël gjerman të Düren.

Zyrtarët nuk kanë qenë në gjendje të identifikojnë se nga e kanë origjinën dronët ose kush i drejtonte ato.

Ministri i Brendshëm i Gjermanisë, Alexander Dobrindt, deklaroi se do të ngrejë sot çështjen e mbrojtjes kundër dronëve në një takim të ministrave të Brendshëm evropianë, i cili fillimisht u propozua si një samit për migracionin.

Më herët gjatë ditës së djeshme, ministri premtoi se do të paraqesë legjislacion të propozuar që e bën më të lehtë për policinë t'i kërkojë ushtrisë të rrëzojë dronë.

Shfaqjet e fundit të dronëve në të gjithë Bashkimin Evropian nxitën një samit të liderëve në Kopenhagen këtë javë.

Disa shtete anëtare të BE-së kanë mbështetur planet për një mur dronësh për të zbuluar shpejt dhe shkatërruar dronë rusë.

Njëzet dronë rusë fluturuan mbi Poloni dhe avionë rusë MiG-31 hynë në hapësirën ajrore të Estonisë në incidente të ndara të kohëve të fundit.

Aeroportet e Kopenhagenit dhe Oslos u detyruan të mbyllen pasi dronë të paidentifikuar u panë pranë hapësirave ajrore të aeroportit dhe ushtarake.

Kancelari gjerman Friedrich Merz tha përpara samitit se ndërhyrjet në hapësirën ajrore po përkeqësoheshin dhe se ishte e arsyeshme të supozohej se dronët vijnë nga Rusia.

Rusia ka mohuar çdo përfshirje, ndërsa autoritetet daneze thonë se nuk kishte prova se Moska ishte e përfshirë.

Duke folur në një samit në qytetin turistik të Detit të Zi, Soçi, të enjten, Presidenti rus Vladimir Putin qeshi me sugjerimet se ai urdhëroi dronë për Danimarkën.