web counter
LEXO PA REKLAMA!

SHKARKO APP

App Store
Google Play

BE i bën thirrje Kosovës: Formoni sa më shpejt Qeverinë e re

20 Prill 2025, 22:25, Kosova & Bota CNA

BE i bën thirrje Kosovës: Formoni sa më shpejt Qeverinë e re

Bashkimi Europian ka thënë se është thelbësore që Kosova të formojë një qeveri të re sa më shpejt që të jetë e mundur, pasi vendi ka ngecur në përpjekjet për të formuar institucione të reja më shumë se dy muaj pas zgjedhjeve parlamentare.

“Formimi i shpejtë i Qeverisë është thelbësor që Kosova të avancojë reforma të rëndësishme në të gjithë sektorët, të cilat do të përmirësojnë cilësinë dhe kushtet e jetesës së popullit të Kosovës”,-tha Zyra e BE-së në Prishtinë.

Zyra tha se BE-ja po i ndjek nga afër zhvillimet në lidhje me konstituimin e Kuvendit dhe formimin e Qeverisë dhe shpreson që ky proces të përfundojë së shpejti. Kosova nuk arriti të konstituojë Kuvendin e ri dy herë gjatë kësaj jave, për shkak të mosmarrëveshjeve procedurale mes partive politike që siguruan mandate në zgjedhjet parlamentare të 9 shkurtit.

Partia Demokratike e Kosovës (PDK), Lidhja Demokratike e Kosovës (LDK) dhe Aleanca për Ardhmërinë e Kosovës (AAK) insistojnë që anëtarët e Qeverisë që janë zgjedhur deputetë të japin dorëheqje, në të kundërtën nuk do ta votojnë raportin për verifikimin e mandateve të deputetëve, hap që duhet bërë për vazhdimin e Kuvendit të ri dhe formimin e Qeverisë së re.

Mirëpo, lideri i LVV-së dhe ushtrues i detyrës së kryeministrit, Albin Kurti, thekson se një akt i tillë formal është i panevojshëm, sepse ekzekutivi ka qenë në detyrë, apo ka dhënë dorëheqje që nga 23 marsi.

Më herët, ambasadorët e Britanisë së Madhe dhe Gjermanisë në Prishtinë u kanë bërë thirrje partive politike që të bashkëpunojnë për tejkalimin e pengesave për formimin e institucioneve të reja të Kosovës./CNA





Lajmet e fundit nga