Akuzat në adresë të institucionit/ "Kushtetuesja": Deklaratat të pamatura, cenim i ndarjes së pushteteve

8 Shtator 2025, 18:34, Kosova & Bota CNA

Akuzat në adresë të institucionit/ "Kushtetuesja":

Gjykata Kushtetuese e Kosovës ka reaguar pas deklaratave të palëve politike dhe akuzave në adresë të këtij institucioni. Kushtetuesja i ka konsideruar deklaratat si të pamatura dhe si presione ndaj institucioneve të drejtësisë.

GJK në deklaratën e saj shprehet se vendimet bazohen në Kushtetutë dhe në praktikën gjyqësore dhe praktikat ndërkombëtare.

Kushtetuesja ka apeluar partitë politike që të respektojnë pavarësinë e institucionit dhe të mos cenojnë integritetin e gjyqtarëve.

"Gjykata Kushtetuese e Republikës së Kosovës shpreh shqetësimin e saj përkitazi me deklarimet e pamatura të zyrtarëve të lartë shtetëror dhe të zgjedhurve politikë.

Pavarësia e Gjykatës Kushtetuese nuk është privilegj i gjyqtarëve të saj, por është themel i shtetit të së drejtës.

Pavarësia dhe paanshmëria e Gjykatës Kushtetuese të Republikës së Kosovës janë të mbrojtura me Kushtetutë, dhe asnjë institucion, parti politike apo individ nuk mund të ndërhyjë në punën e saj. Çdo përpjekje për të ushtruar presion mbi gjyqtarët kushtetues përbën cenim të parimit themelor të ndarjes së pushteteve dhe minon besimin e qytetarëve në sundimin e ligjit dhe në vetë demokracinë.

Vendimet e Gjykatës Kushtetuese bazohen ekskluzivisht në Kushtetutën e Republikës së Kosovës, në praktikën e saj gjyqësore, si dhe në standardet ndërkombëtare për mbrojtjen e të drejtave dhe lirive themelore të njeriut. Rrjedhimisht, çdo deklaratë që tenton të relativizojë apo paragjykojë vendimet e Gjykatës Kushtetuese është jo vetëm e papërgjegjshme, por edhe e dëmshme për zhvillimin demokratik të vendit.

Gjykata apelon tek të gjitha palët që të respektojnë pavarësinë e saj, të përmbahen nga deklaratat që cenojnë integritetin e gjyqtarëve dhe vendimmarrjen e tyre të pavarur, dhe të kontribuojnë në forcimin e rendit kushtetues.

Vetëm përmes respektimit të këtij parimi themelor mund të garantohet një shoqëri e drejtë, demokratike dhe funksionale për të gjithë qytetarët e Kosovës", thuhet në deklaratë. /CNA