Ka falsifikuar moshën me 4 vite, plas skandali në Gjermani me talentin e Dortmundit

2023-03-30 15:13:00, Sport CNA

Youssoufa Moukoko është e ardhmja e Borussia Dortmundit. Me U-17 e skuadrës gjermane ai shënoi 90 gola në 56 ndeshje dhe këtë sezon, në moshën (gjoja) 18-vjeçare ka shënuar 6 gola në 18 ndeshje të Bundesligës.

Natyrisht, ajo që ka shoqëruar "perlën" e lindur në Kamerun janë dyshimet për moshën e tij, veçanërisht pasi gazeta "Bunte" publikoi një certifikatë lindjeje, sipas së cilës Moukoko do të kishte lindur më 19 korrik 2000. Domethënë, ai është 22 vjeç sot dhe jo 18.

Dokumenti mban numrin 4621/2000 dhe është lëshuar në Yaoundé, kryeqyteti i Kamerunit në emër të "Youssoufa Mohamadou". Me sa duket, revista e gjeti dokumentin ndërsa hetonte rezymenë e Moukokos.

Nuk është e qartë nëse kopja e certifikatës së lindjes është autentike. Nëse po, kjo do të thotë se Moukoko do të ishte katër vite më i vjetër se sa thuhet, që do të thotë se gjermani do ta kishte bazuar karrierën e tij premtuese në një mashtrim të plotë.

Për më tepër, në realitet prindërit e Moukoko mund të jenë gjithashtu të tjerë. Në dokumentin e publikuar nga "Bunte", si prindër të fëmijës figurojnë njëfarë Ousman Mohamadou (taksist) dhe njëfarë Youssoufa Harira (shtëpiake).

Para gjykatës, Joseph Moukoko, i cili jeton me Youssoufa në Gjermani, siguroi se ai është babai biologjik i profesionistit të BVB. Më parë, në "Der Spiegel’ ishte publikuar tashmë një raport që fliste edhe për moshën e futbollistit.

Moukoko donte të pengonte "Bunte" nga publikimi i certifikatës së pretenduar të lindjes dhe e paditi "Bunte" pa dobi. Në fund të shkurtit, Gjykata Rajonale e Frankfurtit vendosi se "në parim, lejohet të raportohen dyshime për moshën dhe origjinën reale të futbollistit profesionist që është objekt i ankesës" duke marrë parasysh se ka pasur "një interes publik si dhe prova të mjaftueshme”, sqaroi gjykata rajonale.

Regjistri civil i Hamburgut konfirmoi se lindja e Moukoko në vitin 2016 u certifikua më pas në Gjermani. Prandaj, lojtari i BVB ka dokumente zyrtare që përcaktojnë datëlindjen e tij si 20 nëntor 2004.

Avokati i Moukoko tha për "Bild" se "të gjitha dokumentet zyrtare që kemi, të lëshuara nga autoritetet si në Kamerun, ashtu edhe në Gjermani" konfirmojnë datën e lindjes 2004. Këto dokumentet përfshijnë gjithashtu "çertifikatën e vërtetë të lindjes" të Moukoko. Sigurisht, dyshimi është ende aty, sidomos pas çertifikatës së supozuar të lindjes të botuar në "Bunte".