Europiani/ Trajneri i Shqipërisë nuk është i qetë, ja

2024-05-01 12:11:00, Sport CNA

Ndonëse Europiani do pak më shumë se një muaj nga starti, trajneri i Shqipërisë, Silvinjo, ka nisur nga puna, për zgjedhjen e lojtarëve që do të marrë me vete në Gjermani.

Një nga problemet më të mëdha, për teknikun e kuqezinjve, do të jetë sulmi. Disa nga futbollistët e këtij reparti po shkëlqejnë, ndërsa shënojnë rregullisht.

I tillë është rasti i Rei Manajt, që po kalon sezonin më të mirë në karrierë në Turqi. Nuk duhet harruar as Daku, që nuk ndalet së shënuar në Rusi, apo edhe Uzuni në Spanjë.

Formë të kënaqshme kanë treguar edhe Sokol Cikalleshi, Taulant Seferi dhe Ernest Muçi.

Nëse këto mund të quhen “halle” luksi, nuk është e njëjtë situata me sulmuesit e tjerë. Armando Broja, shihet si lojtar shumë i rëndësishëm për Shqipërinë, por 22-vjeçari po has vështirësi të mëdha në Premier League.

Minutat me Fulham-in kanë qenë të pakta për lojtarin shqiptar, i cili ka humbur tërësisht formën e tij. E njëjta situatë edhe për Jasir Asanin. Sulmuesi i djathë, ka rëndësi të madhe për trajnerin Silvinjo, si lojtari i vetëm në atë krahë, i cili luan me këmbën e majtë. Edhe 28-vjeçari nuk po arrin të gjejë hapësira me Guangju në Korenë e Jugut dhe gjendja e tij, shqetëson jo pak trajnerin e Shqipërisë.

E paqarte është situata edhe për Arbnor Mujën, i cili ndryshoi skuadër në janar, duke u transferuar në Turqi të Samsunspor, por pa arritur të lërë shenjë.

Arbër Hoxha, duket gjithashtu një zgjedhje interesante për Europian, por e vetmja gjë që e penalizon, është eksperienca me ekipin kombëtar.

Sa i përket reparteve të tjera, dilemat janë të pakta, pasi duket se gjithçka është e zgjidhur. Në portë nuk ka dyshime, me Etrit Berishën dhe Tomas Strakoshën, që do të duelojnë për fanellën e titullarit, ndërsa Elhan Kastrati me shumë mundësi do të jetë zgjedhje e tretë.

Në mbrojtje problemet nuk mungojnë, me Ardian Ismajlin, që është jashtë fushave prej një muaji për shkak dëmtimi dhe i duhet pak kohë për tu rikuperuar në 100%. Te Sassuolo, u rikthye titullar Marash Kumbulla, por edhe ai ka nevojë për më shumë minuta, pasi ka ardhur nga një dëmtim i rëndë, që e mbajti jashtë për disa muaj.

Enea Mihaj, i cili po luan rregullisht në Portugali, nuk shihet si zgjedhje e parë nga Silvinjo, njëjtë si Mersinaj me Veselin.

Për krahun e majtë, janë Aliji dhe Mitaj, por ky i fundit po luan si mesfushor qendre në Rusi me skuadrën e tij. Krahu i djathtë i mbrojtjes, nuk ka probleme, me Hysaj dhe Balliun aty.

Në mesfushë, Ramadani dhe Asllani, mbeten të paprekshëm. Qazim Laçi dhe Keidi Bare gjithashtu janë konstantë dhe kanë treguar qëndrueshmëri këtë sezon, pavarësisht nivelit të kampionatit ku luajnë. I vetmi që shqetëson është Klaus Gjasula që është dëmtuar shpesh këtë sezon dhe momentalisht po vuan një lëndim në muskujt e barkut.

UEFA ka lejuar që kombëtaret të marrin 26 lojtarë në Europian, por pavarësisht kësaj, trajnerin Silvinjo, e pret një punë shumë e vështirë.