Ulja e çmimeve të tureve të aventurës, operatorët: Po humbet cilësia e qëndrueshmëria

2 Janar 2025, 12:41, Ekonomi CNA

Ulja e çmimeve të tureve të aventurës, operatorët: Po

Turet turistike në Shqipëri po shiten me çmime që shpesh nuk mbulojnë as kostot bazë. Ky është shqetësimi i turoperatorëve të turizmit të aventurës, të cilët thonë se tregu ka nevojë për kontrolle lidhur me licensimet e operatorëve.

“Shumë guida që kanë hapur bizneset e tyre ofrojnë ture me çmime të ulëta në këto platforma për të konkurruar, por kur punojnë për operatorë të tjerë, kërkojnë tarifa ditore prej 100-150 euro (me makinë). Kjo qasje krijon një kontradiktë dhe dëmton të gjithë tregun turistik”, thotë Alket Braho nga Visit Albania Tour.

Ai shton se, çmimet e ulëta rrezikojnë cilësinë dhe qëndrueshmërinë. Sipas tij, nuk ka kuptim që një tur në Berat të shitet për 35 euro për person, ose një tur në Bovillë për vetëm 13 euro? Nga këto shifra, 30% i përfundojnë platformave si GetYourGuide dhe Viator, ndërsa operatorët dhe guidat përballen me kosto të papërballueshme.

“Çdo person që ka makinë mund të regjistrohet në platforma si GetYourGuide dhe Viator.Ne si kompani e vogël kemi qenë shumë mirë me ture ditore më parë por këtë vit nuk mund t’i bashkoheshim luftës “kush shet më lirë”,- shton z. Braho.

Marsel Kalemi, nga Kalemi Travel thotë se, shteti duhet të bëhet rregullator i licencimeve.

“Nuk po them që shteti të bëhet rregullator i çmimeve, por duhet të bëhet rregullator i licencimeve. Nuk mund të ofrojë ture të tilla çdo tur guidë që ka një makinë. Platforma Getyourguide ka kritere të forta për t’u bërë pjesë e platformës, por problemi te ne është që çdo person këtu, për shkak të mungesës së rregullatorëve për licencim, i plotëson ato kritere", thotë z. Kalemi.

“Turizmi shqiptar ka potencial të jashtëzakonshëm, por ky potencial nuk mund të arrihet me çmime të ulëta dhe praktika të dëmshme. Vetëm me profesionalizëm dhe vlerësim të drejtë të punës suaj mund të ndërtojmë një treg që garanton cilësi dhe zhvillim për të gjithë", shton në fund z. Braho.

Turoperatorët vendas theksojnë se , ka disa kosto që nuk duhen injoruar: Çmimi i naftës është 180 lekë për litër, një kosto thelbësore për çdo tur që përfshin transport.

Paga ditore e një guide profesioniste është mbi 70 euro (pa përfshirë makinën), ndërkohë që kjo shumë rritet kur shtohen shpenzimet për transport dhe mirëmbajtjen e automjetit.

Aktorët e tregut tregojnë për Monitor se, kjo problematikë ndodh për disa arsye:

Treg i paqëndrueshëm: Çmime kaq të ulëta nuk mbulojnë as kostot bazë, duke dëmtuar qëndrueshmërinë e operatorëve dhe guidave.

Cilësia bie: Çmimet e ulëta sjellin shërbime më të dobëta, duke dëmtuar përvojën e turistëve dhe reputacionin e vendit.

Garë e pakuptimtë: Një garë me çmime të ulëta dëmton të gjithë sektorin, duke ulur standardet dhe zhvlerësuar punën e secilit./ Revista Monitor