web counter
LEXO PA REKLAMA!

SHKARKO APP

App Store
Google Play

E fundit!

x

Prezantohet raporti për 2024-ën/ Guvernatori Sejko: Rritje e qëndrueshme, performanca e eksporteve u ndikua nga tregjet e huaja

13 Tetor 2025, 15:56, Ekonomi CNA

Prezantohet raporti për 2024-ën/ Guvernatori Sejko: Rritje e

Guvernatori i Bankës së Shqipërisë, Gent Sejko, ishte sot i pranishëm në Komisionin për Ekonominë, Punësimin dhe Financat të Kuvendit, ku u prezantua raportit vjetor për vitin 2024.

Në fjalën e tij, Sejko theksoi se ekonomia shqiptare pritet të vijojë me ritme të qëndrueshme rritjeje në afatin e mesëm, duke krijuar kushte për përmirësimin e tregut të punës, rritjen e pagave dhe mirëqenien e qytetarëve.

“Një nga momentet kyçe të vitit 2024 ishte pranimi i Shqipërisë në Zonën e Vetme të Pagesave në Euro (SEPA), më 21 nëntor, duke shënuar një hap konkret drejt integrimit financiar me Bashkimin Europian. Ky zhvillim konfirmon përputhjen e legjislacionit shqiptar me standardet europiane në fushën e pagesave dhe mbikëqyrjes financiare. Ky vendim shënon një hap konkret drejt integrimit të vendit në tregun europian dhe konfirmon nivelin e lartë të pajtueshmërisë ligjore të Shqipërisë me Bashkimin Europian në fushën e pagesave dhe mbikëqyrjes financiare.

Vëllimi i aktivitetit ekonomik u rrit me 4% gjatë vitit 2024, i mbështetur nga zgjerimi i konsumit familjar, i investimeve private, si dhe nga rritja e mëtejshme e të ardhurave të turizmit. Kahu pozitiv i zhvillimit të ekonomisë ka vijuar edhe gjatë vitit 2025, me një rritje ekonomike prej 3,6% për 6-mujorin e parë të vitit. Kjo ecuri pasqyron kontributin e disa faktorëve, ndër të cilët gjej me vend të nënvizoj gjendjen e mirë financiare të sektorit privat, klimën pozitive të besimit dhe kushtet e favorshme të financimit.

Rënia e çmimeve në tregjet ndërkombëtare, ngadalësimi i tregtisë botërore dhe kostot e larta të prodhimit kanë ndikuar negativisht në performancën e eksporteve.

Kërkesa e lartë për fuqi punëtore ka sjellë rritje të numrit të të punësuarve dhe rënie të normës së papunësisë në nivele historike. Pagat janë rritur me 8,6% në vitin 2024 dhe me 9,5% në gjysmën e parë të vitit 2025.

Inflacioni ka zbritur nga 4,8% në vitin 2023 në rreth 2,2% për vitin 2024 dhe tremujorët e parë të 2025. Eksportet totale arritën vlerën 9,1 miliardë euro në 2024, të nxitura kryesisht nga turizmi që kapën 5 miliardë euro. Remitancat dhe investimet e huaja direkte kanë vijuar të rriten, duke arritur përkatësisht 1 miliard euro dhe 1,6 miliardë euro.

Ne ndërmorëm dy ulje të normës bazë të interesit, duke e zbritur atë nga niveli 3,25% në fillim të vitit, në 2,75% në fund të vitit 2024 dhe në 2,5% në muajin korrik 2025. Paralelisht me të, intensifikuam blerjet e valutës në tregun vendas, duke tërhequr thuajse 914 milionë euro gjatë vitit 2024 dhe duke vijuar me ritme të ngjashme edhe gjatë vitit 2025.

Cilësia e kredisë vijoi të përmirësohet dhe treguesi i kredive me probleme zbriti në 4%, duke shënuar nivelet më të ulëta që prej vitit 2008. Kapitalizimi arriti nivele të larta rreth 20%, likuiditeti mbeti mbi kërkesat rregullatore, ndërsa analizat tona sugjerojnë nivele të kontrolluara të rreziqeve sistemike.

Kjo pritet të sjellë kursime të konsiderueshme për ekonominë shqiptare. Sistemi AIPS Euro i Bankës së Shqipërisë ka kursyer rreth 140 milionë euro që nga nisja e tij në janar 2022.

Perspektiva e zhvillimeve ekonomike mbetet pozitive, me pritshmërinë që rritja e qëndrueshme të sjellë përmirësim të punësimit, pagave dhe mirëqenies, si dhe inflacion të ulët dhe konsolidim të ekuilibrave makroekonomikë. Megjithatë, tensionet gjeopolitike dhe sfidat strukturore kërkojnë reforma të mëtejshme në fusha si arsimi, shëndetësia, infrastruktura, klima e biznesit dhe investimet strategjike”,-tha Sejko./CNA

 

 





Lajmet e fundit nga