web counter
LEXO PA REKLAMA!

SHKARKO APP

App Store
Google Play

E fundit!

x

Minierat e hapura pas vitit 2000 do të monitorohen për mbrojtjen e mjedisit deri në 2028

10 Dhjetor 2025, 12:13, Ekonomi CNA

Minierat e hapura pas vitit 2000 do të monitorohen për mbrojtjen e

Të gjitha minierat dhe metalurgjitë e hapura apo të trashëguara pas vitit 2000, qoftë ende me aktivitet apo të mbyllura do t’i nënshtrohen procesit të monitorimit, me synim mbrojtjen e mjedisit.

Projekti që do të zhvillohet për periudhën 2026-2028, synon të identifikojë burimet ndotëse, të hartojë masat parandaluese dhe të sigurojë një mjedis minerar dhe metalurgjik të pastër dhe të sigurt.

Monitorimi për vlerësimin e situatës së mjedisit për këto objekte do të shoqërohet me hartimin e një raporti vjetor, i cili do të realizohet çdo vit deri në 2028, me një kosto prej 4 mln lekësh për vit.

Të dhënat për projektin janë publikuar në dokumentin e programit buxhetor afatmesëm 2026-2028, të rishikuar.

“Projekti do të trajtojë të gjitha objektet minerare dhe metalurgjike, aktive dhe pasive, të trashëguara apo të hapura pas viteve 2000, në përputhje me strategjinë e Qeverisës për mjedisin, me kuadrin ligjor minerar dhe mjedisor, veçanërisht ligjit Nr 10304, datë 15.7.2010, “Për sektorin minerar në Republikën e Shqipërisë’ të ndryshuar, akteve nënligjore në zbatim të tij. Projekti do të pasqyrojë gjendjen reale, burimet ndotëse, masat parandaluese dhe ndërhyrjet e nevojshme për një mjedis minerar dhe metalurgjik të pastër dhe pa ndotje”, thuhet në dokument.

Për sektorin minerar, autoritetet do të zbatojnë edhe një tjetër projekt për monitorimin e gjendjes mjedisore te minierat e mbyllura.

Sipas parashikimeve, një projekt i tillë do të realizohet çdo vit nga 2026 deri në 2028, me një kosto prej 6,4 milionë lekësh për vit.

“Minierat e mbyllura dhe të braktisura në vazhdimësi shoqërohen me një sërë problemesh. Ndërmarrja e një projekti të tillë mbi monitorimin e rreziqeve minerare është i një rëndësie të madhe, sepse parashikon dhe parandalon dukuritë e rreziqeve potenciale minerare duke krijuar siguri për jetën dhe shëndetin e njerëzve përreth zonave minerare si edhe për ruajtjen dhe rehabilitimin e mjedisit natyror, për ta kthyer atë gradualisht në një mjedis normal jetese dhe pune”, thuhet në dokument.

Sipas të dhënave të Agjencisë Kombëtare të Burimeve Natyrore deri më 31 dhjetor 2024, janë dhënë 540 leje shfrytëzimi, sipas llojeve të mineraleve.

Numri më i lartë i lejeve aktive është për shfrytëzimin e mineralit të kromit me 243 leje, e ndjekur nga shfrytëzimi i gëlqereve në 147 leje shfrytëzimi, 31 leje shfrytëzimi janë aktive për hekur dhe nikel./ Monitor 

 





Lajmet e fundit nga