web counter
LEXO PA REKLAMA!

SHKARKO APP

App Store
Google Play

E fundit!

x

Energjia diellore zuri 29% të peshës në prodhimin neto vendas gjatë tremujorit të tretë të vitit

26 Nëntor 2025, 22:56, Ekonomi CNA

Energjia diellore zuri 29% të peshës në prodhimin neto vendas

Viti 2025 ka rezultuar një vit aspak i favorshëm nga ana hidrike. Prodhimi në total i energjisë në vend ka shënuar rënie në raport me vitin 2024 çka ka bërë që në tremujorin e tretë importet të rriteshin me 65 për qind në raport me një vit më parë.

Prodhimi nga hidrocentralet ka qenë më i ulët e për rrjedhojë pesha që fotovoltaikët kanë pasur në totalin e energjisë të rritet ndjeshëm. Futja në prodhim e një seri impiantesh me kapacitet të konsiderueshëm ka bërë që në tremujorin e tretë, energjia diellore që kategorizohet në fakt si “të tjerë” bilancin e energjisë të zërë gati 1/3 e totalit.

“Gjatë tremujorit të tretë të vitit 2025, energjia elektrike në dispozicion u ul me 1,1%. Prodhimi neto vendas i energjisë elektrike në këtë periudhë u ul me 31,3%, duke arritur vlerën 1.075 GWh nga 1.565 GWh energji të prodhuar në tremujorin e tretë të vitit 2024. Ky prodhim u realizua nga hidrocentralet publike në masën 54,5%, nga hidrocentralet private dhe koncensionare në masën 16,5% dhe nga të tjerë prodhues në masën 29,0% të prodhimit neto vendas të energjisë elektrike.

Importi bruto i energjisë elektrike (energji në marrje), në tremujorin e tretë të vitit 2025, arriti vlerën 1.260 GWh, nga 762 GWh që ishte në të njëjtën periudhë të një viti më parë, duke shënuar një rritje prej 65,3%. Eksporti bruto i energjisë elektrike (energji në dhënie) arriti 312 GWh, nga 282 GWh, duke shënuar një rritje prej 10,8%”, thuhet në bilancin e energjisë për tremujorin e tretë të këtij viti.

Sipas INSTAT hidrocentralet publike, në tremujorin e tretë të vitit 2025, prodhuan 586 GWh nga 1.088 GWh të prodhuar në tremujorin e tretë të vitit 2024, duke shënuar kështu një rënie të prodhimit me 46,1%. Hidrocentralet private dhe koncensionare, prodhuan 178 GWh nga 292 GWh të prodhuar në të njëjtën periudhë të një viti më parë, duke shënuar një rënie të prodhimit të energjisë elektrike me 39,0%.

Të tjerë prodhues, prodhuan 311 GWh nga 185 GWh të prodhuar në të njëjten periudhë të një viti më parë, duke shënuar një rritje të prodhimit të energjisë elektrike me 68,4%. Shkëmbimi i energjisë elektrike (diferenca mes eksportit dhe importit bruto të energjisë), në tremujorin e tretë të vitit 2025, ka arritur vlerën negative prej 948 GWh.

INSTAT raportoi se humbjet në rrjet kanë arritur vlerën 323 GWh në tremujorin e tretë të vitit 2025 nga 344 GWh në tremujorin e tretë të vitit 2024, duke shënuar një rënie me 5,9%. Pesha që zënë humbjet në rrjet në totalin e energjisë elektrike në dispozicion gjatë tremujorit të tretë të vitit 2025 është 16,0 % nga 16,8% që ishte në tremujorin e tretë të vitit 2024

“Përdorimi i energjisë elektrike nga konsumatorët, në tremujorin e tretë të vitit 2025, u ul me 0,1%, duke arritur vlerën 1.700 GWh nga 1.702 GWh që ishte në tremujorin e tretë të vitit 2024. Në uljen e përdorimit të energjisë elektrike nga konsumatorët kanë ndikuar kryesisht konsumatorët jo familjarë, të cilët shënuan një ulje të konsumit me 0,3%, ndërsa konsumatorët familjarë regjistruan një rritje të lehtë prej 0,1%, krahasuar me tremujorin e tretë të vitit 2024”, thuhet në publikim./Monitor.al





Lajmet e fundit nga