Safe Journalists dënon fushatën e linçimit ndaj gazetareve që raportojnë mbi SPAK-un, korrupsionin dhe krimin e organizuar

26 Shkurt 2026, 22:04, Aktualitet CNA

Safe Journalists dënon fushatën e linçimit ndaj gazetareve

Rrjeti SafeJournalists (SJN) shpreh shqetësim serioz për fushatën e vazhdueshme të linçimit online dhe ngacmimet e koordinuara që po targetojnë gazetaret Anila Hoxha dhe Klodiana Lala, raportimi i të cilave mbi Strukturën e Posaçme Kundër Korrupsionit dhe Krimit të Organizuar (SPAK), korrupsionin në nivele të larta dhe çështjet e krimit të organizuar, i shërben qartë interesit publik.

Shkalla e përhapjes dhe toni degradues, me përmbajtje gjinore, i një pjese të madhe të komenteve tejkalojnë kufijtë e kritikës legjitime dhe tregojnë një model intimidimi që rrezikon të krijojë një efekt frikësues ndaj gazetarisë investigative. Komentet publike të formuluara në këtë mënyrë mund të nxisin më tej ngacmime, sjellje armiqësore apo përpjekje për mobilizim të sulmeve online ndaj gazetareve.

Gazetarët që mbulojnë korrupsionin dhe krimin e organizuar janë veçanërisht të ekspozuar ndaj presionit dhe narrativave hakmarrëse për shkak të ndjeshmërisë dhe ndikimit të raportimit të tyre. Insinuatat me natyrë seksuale, sulmet ndaj reputacionit dhe abuzimi i koordinuar online dëmtojnë jo vetëm sigurinë dhe dinjitetin e gazetareve në fjalë, por edhe llogaridhënien demokratike dhe besimin publik në shqyrtimin e pavarur të aktorëve të fuqishëm.

SafeJournalists Network shpreh solidaritet të plotë me Anila Hoxhën, Klodiana Lalën dhe me të gjithë gazetarët që punojnë në interes publik për të mbajtur pushtetin përgjegjës. Ne u bëjmë thirrje figurave publike dhe profesionistëve të medias që të përmbahen nga retorika që nxit ngacmime, sulme me bazë gjinore apo përpjekje për denigrim të kolegëve. Mospajtimet profesionale nuk duhet të kthehen kurrë në fushata intimidimi apo degradimi personal.

Gazetarët kanë një përgjegjësi të veçantë për të respektuar standardet etike dhe për të mbrojtur integritetin e profesionit. Normalizimi i taktikave të linçimit ndaj reporterëve që mbulojnë korrupsionin dhe krimin e organizuar dobëson jo vetëm individët, por edhe besueshmërinë e medias në tërësi dhe funksionin e saj të mbikëqyrjes demokratike.

Gjithashtu, u bëjmë thirrje zyrtarëve publikë shqiptarë, aktorëve politikë, përfaqësuesve të mediave dhe institucioneve përkatëse që të distancohen qartë nga një retorikë e tillë dhe të kontribuojnë aktivisht në krijimin e një mjedisi të sigurt dhe mundësues për raportim të pavarur.

SJN do të vazhdojë ta monitorojë situatën nga afër dhe mbetet i përkushtuar për të mbështetur gazetarët që përballen me presione dhe kërcënime gjatë ushtrimit të detyrës së tyre profesionale.

Prishtinë – Shkup – Sarajevë – Zagreb – Beograd – Podgoricë – Tiranë, 26 shkurt 2026

Shoqata e Gazetarëve të Bosnjë dhe Hercegovinës

Shoqata e Gazetarëve të Kosovës

Shoqata e Gazetarëve të Maqedonisë

Shoqata Kroate e Gazetarëve

Shoqata e Pavarur e Gazetarëve të Serbisë

Sindikata e Mediave e Malit të Zi./ CNA