web counter
LEXO PA REKLAMA!

SHKARKO APP

App Store
Google Play

E fundit!

x

Reshjet në Qarkun e Korçës/ Situata nën kontroll, vijojnë ndërhyrjet në disa bashki

24 Nëntor 2025, 09:22, Aktualitet CNA

Reshjet në Qarkun e Korçës/ Situata nën kontroll,

Reshjet e ditëve të fundit kanë shkaktuar një sërë problematikash në territorin e Qarkut Korçë, por strukturat vendore dhe ekipet e emergjencave civile kanë vijuar punën gjatë natës dhe mëngjesit të sotëm për normalizimin e situatës. Sipas raportimit të orës 09:00 të datës 24 nëntor 2025, situata paraqitet e stabilizuar në pjesën më të madhe të zonave, ndërsa ndërhyrjet vijojnë aty ku është e nevojshme.

Bashkia Korçë

Në Njësinë Administrative Voskopojë ka vijuar sistemimi dhe pastrimi i rrugës që çon drejt varrezave. Në Bulgarec, në fshatin Çiflig, po pastrohen tombinot përgjatë unazës. Po monitorohen prurjet e lumit të Kamenicës dhe degëzimet mbi Dvoran. Ndërkohë, në Voskop po punohet për riparimin e argjinaturave të dëmtuara. Në segmentin Tudas–Lavdar–Bozdovec–Mazrekë vijojnë punimet për hapjen e rrugës.

Bashkia Kolonjë

Është devijuar rrjedha e lumit për të mbrojtur këmbët e urës së Qinamit. Në lagjen Kaskollare në fshatin Starje janë larguar ujërat e mbledhura, ndërsa në Prodan janë kryer punime në shtratin e lumit. Shërbimi zjarrfikës ka pastruar pusetën qendrore të ujit në Ersekë. Sipas NJVKSH, uji në qytet është i pijshëm.

Bashkia Maliq

Vijon puna për mbylljen e çarjeve në argjinaturat e lumenjve Dunavec dhe Devoll, me mbështetjen e Ministrisë së Mbrojtjes dhe subjekteve private. Strukturat vendore po punojnë për normalizimin e të gjitha problematikave.

Bashkia Pustec

Situata paraqitet e stabilizuar dhe pa probleme.

Bashkia Devoll

Në Progër është punuar për sistemimin e lumit dhe për rehabilitimin e rrugëve të dëmtuara nga erozioni. Në Hoçisht është ndërhyrë në lumin e Borshit, pas përmbytjes së tokave bujqësore nga çarja e tij.

Bashkia Pogradec

Komisionet e verifikimit kanë konstatuar dëme në 62 familje dhe kanë përgatitur procesverbalet përkatëse. Janë shpërndarë ndihma ushqimore, ndërsa vijon monitorimi i terrenit për raste të tjera. Probleme janë evidentuar përgjatë lumenjve të Verdovës dhe Rëmenjit, si dhe pranë grykëderdhjes te guroret. Në Nj.A. Dardhas janë pastruar katër akse rrugore që tani janë të kalueshme. Në qytet vijon pastrimi i pusetave dhe i rrugëve. Në aksin Pogradec–Bucimas ka çeduar rreth 50 metra nga korsia e biçikletave, ndërsa në rezervuarin Stropskë 2 është raportuar një shkarje dherash që po vlerësohet nga ekipi i emergjencave. Hidrovori i Tushemishtit funksionon normalisht.

OSHEE

Pjesa më e madhe e zonave furnizohen normalisht me energji. Pa energji ka mbetur vetëm zona Kurtesh (11 abonentë), ndërsa të gjithë fiderat që furnizojnë objektet me rëndësi të veçantë janë në funksion të plotë./ CNA





Lajmet e fundit nga