E fundit!

14:42 Editorial

Çmenduria e një avokati të pandehur

Plarent Ndreca na qenka bërë sot autor i një zbulimi epoka...

Pashkët në CNA TV/ Mijëra besimtarë në Korçë kremtojnë ditën e shënuar, ringjalljen e Krishtit

5 Maj 2024, 08:45, Aktualitet CNA

Mesha për Pashkët

Besimtarët ortodoksë mbrëmjen e së shtunës kanë kremtuar natën më të shenjtë, ringjalljen e Krishtit. Mijëra besimtarë kanë mbushur sheshin para katedrales dhe pedonales duke pritur të marrin dritën e zotit nëpërmjet flakës.

Shërbesa e ngjalljes u mbajt nga imzot Joan Pelushi, ndërsa besimtarët ndezën qirinjtë për t’i marrë në shtëpi në shenjë mbarësie dhe mirësie. Besimtarët kanë uruar nëpërmjet CNA TV për një Pashkë të mbarë e me shëndet, ndërsa thonë se mezi e kanë pritur këtë ditë.

Mesazhet nga qytetarët në Korçë

"Gëzuar Pashkën, mbarësi për të gjithë. Në Korçë festohet shumë bukur, unë jam ortodokse, vajzë nga Elbasani e martuar në Korçë. E festoj çdo vit, madje kam edhe emrin e djalit, Kristi. Flakën do ta çoj në shtëpi, është simbol i Pashkës për mbarësi."

"Korçarët e festojnë ndryshe nga rrethet e tjera, ndoshta falë besimit që kanë, por atmosfera është ndryshe. Urimi ynë është gëzuar Pashkën, Krishti u ngjall. Me rënien e guackës së vezës është ringjallja e një trupi të ri."

"Ta gëzojmë këtë festë kaq të mrekullueshme që mezi e presim të vijë për ne ortodoksët. Festohet shumë bukur, me gjithë të mirat."

"Simbolizon shpresën tek e mira. Atmosfera shumë e mirë, edhe pse nuk ka njerëz, ka më pak se herët e tjera. Ju uroj të gjithëve shëndet dhe Pashkë të mbara."

Të entuziazmuar dhe të emocionuar për atmosferën fantastike në Korçë, janë shprehur edhe dy vizitorë grekë të cilët kanë mbetur të surprizuar nga kjo natë.

Mesazhet nga vizitorët grekë

"Jemi nga Greqia, nga Selaniku. Erdhëm të vizitojmë Korçën, kemi shoqëri këtu dhe erdhëm për Pashkën. Është bukur me fishekzjarret, shumë njerëz ishin këtu. Gëzuar Pashkën!"

"Më pëlqeu shumë atmosfera, pashë shumë qytetarë nga Greqia. Grekët dhe shqiptarët u bënë bashkë dhe me të vërtet që më pëlqeu kjo atmosferë e ngrohtë. Edhe ne festojmë njësoj, presim të shkojë ora në mesnatë. Urimi im është që shpresoj të gjithë njerëzit të jenë bashkë."

Pashka ortodokse është një nga festat fetare që bën bashkë jo vetëm qytetarët korçarë, por edhe vizitorë të shumtë që zgjedhin qytetin e Korçës për të festuar. Mesha e Pashkës do të kremtohet mëngjesin e së dielës ku të pranishëm do të jenë klerikët me në krye imzot Joan Pelushin, i cili ka uruar edhe në shërbesën e mesnatës për një Pashkë të mbarë e të begatë./ CNA