E fundit!

19:42 Aktualitet

52 ditë protestë kundër qeverisë/ Qytetarët marshojnë drejt Kryeministrisë

Në sheshin “Skënderbej” janë grumbulluar qytetarët për pro...

“Një program televiziv që e prisnim prej vitesh”/ Ironia therëse e gazetarit Lutfi Dervishi

14 Janar 2023, 11:20, Aktualitet CNA

“Një program televiziv që e prisnim prej vitesh”/ Ironia

Gazetari Lutfi Dervishi ka ironizuar emisionet që trasmetohen në një nga televizionet kombëtare.

Pa përmendur emër televizioni, Dërvishi shkruan me anë të një ironies të hollë, thumbuese, shkruan në rrjete sociale, njoftimin për një program televiziv që e prisnim prej kohësh.

Sipas Dervishit, ky program transmeton vlerat më të mira të shoqërisë shqiptare, i mëson të rinjtë me rëndësinë e librit, dialogut të civilizuar, dashurinë për punën, respektimin e vlerave të vërteta, tolerancën, mendimin ndryshe, rëndësinë e përdorimit me eficensë të kohës dhe mbi të gjitha respektin për të vërtetën.

Ironia e gazetarit dhe mesazhi i fshehur në rrjeshta

“Një program televiziv që e prisnim prej vitesh….

Më kanë thënë, që një televizion kombëtar ka nisur së fundmi transmetimin e një programi shumë popullor.

Programi, më thonë është informues, argëtues, por mbi të gjitha edukues. Transmeton vlerat më të mira të shoqërisë shqiptare, i mëson të rinjtë me rëndësinë e librit, dialogut të civilizuar, dashurinë për punën, respektimin e vlerave të vërteta, tolerancën, mendimin ndryshe, rëndësinë e përdorimit me eficensë të kohës dhe mbi të gjitha respektin për të vërtetën.

Programi, më kanë thënë, rrezaton vetëm mirësi, dituri, kulturë dhe ka ngjallur aq shumë interes sa edhe të huajt që banojnë në Shqipëri kanë vendosur të mësojnë shqipen.

Ajo që e bën programin shumë popullor, më thonë se, janë personazhet, - personalitete të vërteta të jetës kulturore, artistike, mediatike dhe shkencore të Shqipërisë.

Dialogjet që rrezatojnë një kulturë të thellë dhe batutat e nivelit të lartë i mbajnë shikuesit të mbërthyer pas ekranit.

Ndoshta, janë diskutimet për temat e ditës, si inteligjenca artificiale, mësimi dhe puna në distancë, problemet e imazhit të Shqiperisë, keq dhe mirëqeverisja, argëtimi, dobia dhe mallkimi i rrjeteve sociale, konflikti mes brezave në familje, gjuhët e huaja, edukimi mediatik, udhëtimet, kuizet, librat dhe serialet më të mira që e bëjnë këtë program kaq popullor dhe të vlerësuar nga publiku shqiptar i zhuritur për cilësi!

Bravo! Sa me fat që 2023 ka nisur me programe cilësore. Ja pra që televizioni bëhet edhe përtej formatit “mbledhim 4 vetë, dy këtej dhe dy andej dhe flasim për aktualitetin”. Sa mirë. Mrekulli!

Kam vetëm një problem dhe kërkoj ndihmën tuaj. U bë disa ditë, që po e kërkoj këtë program, por nuk po e gjej.

Në cilin televizion transmetohet dhe në cilë orë?”, shkruan Dervishi./CNA.al