Në Korçë çelet ekspozita “Kishat Ortodokse”/ Një udhëtim në historinë dhe besimin ndër shekuj

25 Shkurt 2026, 16:23, Aktualitet CNA

Në kuadër të fillimit të Kreshmës Ortodokse, në qytetin e Korçësështë çelur ekspozita “Kishat Ortodokse në Korçë”, një koleksion i veçantë që hedh dritë mbi historinë, traditën dhe trashëgiminë shpirtërore të zonës.

Koleksionisti Mirgen Shamblli shprehet se realizimi i kësaj ekspozite ka qenë një dëshirë e kahershme, e mbartur prej afro dhjetë vitesh.

Sipas tij, përzgjedhja e materialeve është bërë me kujdes, duke përfshirë fotografi të rralla, dokumente origjinale dhe kartolina postare që pasqyrojnë jetën fetare ndër vite.

Në Korçë çelet ekspozita “Kishat Ortodokse”/

“Ekspozita e sotme është për kishat ortodokse në zonën e Korçës. Me rastin e fillimit të Kreshmës Ortodokse kam menduar të çel këtë ekspozitë me këtë koleksion shumë të veçantë dhe kam dashur rreth 10 vite që ta realizoja."

Ekspozita nis me Kishën e Shën Gjergjit dhe varrezat e Shën Mërisë, ku përmes fotografive dhe materialeve dokumentare paraqiten tre ritualet themelore të jetës njerëzore: lindja, pagëzimi dhe vdekja.

Një hapësirë e veçantë i është kushtuar edhe kishave të fshatrave të qarkut të Korçës, duke përfshirë rreth 80 për qind të tyre.

Në Korçë çelet ekspozita “Kishat Ortodokse”/

Në fokus është vendosur edhe Voskopoja, me dy dokumente origjinale nga shtypshkronja e saj e njohur, si dhe materiale që dëshmojnë proceset zgjedhore për përzgjedhjen e epitropëve para viteve 1900.

"Fillojmë me Kishën e Shën Gjergjit, me varrezat e Shën Mërisë, ku këtu përfshijmë tre ritualet e njerëzimit: lindjen, pagëzimin dhe vdekjen. Këtë e paraqesim me foto dhe materiale të ndryshme, si dokumentarë. Gjithashtu kemi edhe kishat e fshatrave të të gjithë qarkut të Korçës, rreth 80 për qind të tij. Kemi paraqitur Voskopojën me dy dokumente origjinale nga shtypshkronja e Voskopojës, si edhe zgjedhjet që janë bërë para viteve 1900 për zgjedhjen e epitropëve në këto kisha. Është një shumëllojshmëri materialesh në këtë ekspozitë."

Një pjesë e konsiderueshme e koleksionit përbëhet nga fotografi të ruajtura ndër vite në familjet korçare, si dhe materiale të siguruara përmes shkëmbimeve me koleksionistë të tjerë. Mes tyre spikat Katedralja “Burimi Jetëdhënës”, që daton në vitin 1727, mbi të cilën është ngritur më pas Kisha e Mitropolisë, e cila sot po rikthehet në identitetin e saj historik.

"Më së shumti janë fotografi që i kanë pasur njerëzit në shtëpitë e tyre. Kam shkëmbyer materiale edhe me koleksionistë të ndryshëm. Një pjesë e mirë e tyre janë kartolina postare me imazhe nga kishat e vjetra. Përmend këtu Katedralen “Burimi Jetëdhënës”, e cila daton në vitin 1727, dhe mbi këtë kishë është ngritur Kisha e Mitropolisë, e cila sot po kthehet në identitet."

Në Korçë çelet ekspozita “Kishat Ortodokse”/

Shamblli thekson se korçarët janë të njohur me këtë trashëgimi, veçanërisht filantropët që kanë kontribuar me pasurinë e tyre për kishat dhe komunitetin ortodoks. Ai veçon figurën e Jovan Bankës, i cili, sipas tij, la gjithë pasurinë në shërbim të komunitetit ortodoks shqiptar.

"Patjetër që korçarët janë të njohur me këto materiale, veçanërisht filantropët, të cilët kanë shkrirë pasurinë e tyre për kishat dhe komunitetin ortodoks. Veçoj këtu Jovan Bankën, i cili la gjithë pasurinë e tij për komunitetin ortodoks shqiptar."

Përmes kësaj ekspozite, mesazhi që përcillet është ai i paqes dhe dashurisë për të gjithë, në një periudhë reflektimi dhe përkushtimi shpirtëror siç është Kreshma.

"Mesazhi im është paqe dhe dashuri për të gjithë njerëzit. Është Kreshma, që njerëzit të cilët besojnë në Zot të falen.”

Në Korçë çelet ekspozita “Kishat Ortodokse”/

Ekspozita “Kishat Ortodokse në Korçë” mbetet një dëshmi e gjallë e besimit, historisë dhe kontributit qytetar ndër breza.

Përmes dokumenteve, fotografive dhe materialeve të rralla, ajo rikthen në vëmendje rrënjët shpirtërore të Korçës dhe rolin që kisha ka luajtur në jetën sociale e kulturore të komunitetit.

Në prag të Kreshmës, kjo ekspozitë shërben jo vetëm si një udhëtim në të shkuarën, por edhe si një thirrje për reflektim, paqe dhe dashuri mes njerëzve./ CNA