E fundit!

14:27 Aktualitet

Gjykata e Lartë publikon kandidatët për anëtarë të KLGJ-së, ja kur do të mbahen zgjedhjet

Gjykata e Lartë ka shpallur kandidatët zyrtarë për anëtarë...

Investimet në ujësjellës, AKUM lidh kontratën e re 7 milionë euro

14 Shkurt 2024, 12:21, Aktualitet CNA

Investimet në ujësjellës, AKUM lidh kontratën e re 7

Foto ilustruese

Agjencia Kombëtare e Ujësjellës-Kanalizimeve lidhi së fundmi kontratën për një investim të ri me një vlerë kontrate prej 740 milionë lekësh apo rreth 7 milionë euro.

Bëhet fjalë për ndërtimin e ujësjellësit në zonën e Patosit si pjesë e programit të investimeve në këtë sektor e cila po mbështetet me fonde nga institucione ndërkombëtare financiare. Kompania fituese e kësaj procedure është Curri dhe kohëzgjatja e kontratës ka një afat 18-mujor.

Referuar raportit teknik që shoqëron procedurën e publikuar nga AKUM synohet rikonstruksioni i pjesës kryesore të ujësjellësit dhe rrjetit të brendshëm të ujësjellësit të Qytetit Patos. Ky ujësjellës është ndërtuar më herët në vitet 1970 në fazën e parë me vendburim në Zharrës dhe në 1989 si fazë e dytë kur u ndërtua ujësjellësi i Varibobit.

Sipas institucioneve rrjeti i brendshëm i ujësjellësit është ndërtuar pa koncepte të rrjeteve unazore apo zonale duke krijuar vështirësi në disa zona për furnizim me ujë.

“Sasia e ujit që prodhohet sot në sistemin e Ujësjellësit Patos është rreth 9500 m3/dite, domethënë me një prurje uji prej 105- 110 l/s, ndërsa për zonat përreth sasia ditore e prodhuar e ujit është 1830 m3/dite. Si prodhim mujor sasia e ujit është rreth 340,000m3, ndërsa prodhimi vjetor shkon ne rreth 4milion m3/ujë.

Sasia e konsumuar e energjisë mujore për ujësjellësin e qytetit është 740,000 kWh, ndërsa për rrethinat është 41,000 kWh me një sasi totale mujore te konsumit të energjisë 782000 kWh. Prodhimi i ujit raportohet konstant, 131000 m3 /muaj, domethënë 1.570.000 m3 ujë ne vit”, thuhet në dokument.

Ujësjellësi në fjalë është pjesë e investimeve të lidhura me sektorin i cili prej vitesh po mbështetet nga disa kredi. Një program që ka vite që zbatohet është ai për ujësjellësit ruralë sipas programit të shtrirë në 2018-2024 dhe që po mbështetet nga qeveria gjermane me një financim rreth 103 milionë eurosh.

Ndërkohë më herët edhe Banka Botërore ofroi një kredi 75 milionë dollarë për sektorin e ujësjellës-kanalizimeve. Kjo hua e miratuar në vitin 2022 është pjesë e Programit Kombëtar prej 135 milionë USD për modernizimin e sektorit të ujësjellës-kanalizimeve në Shqipëri./Monitor