Goditi me grusht protestuesin në Zvërnec/ Arrestohet punonjësi i sigurisë së kantierit

31 Maj 2026, 08:54, Aktualitet CNA

Goditi me grusht protestuesin në Zvërnec/ Arrestohet punonjësi i

Një punonjës i një shoqërie private sigurie është arrestuar pas pwrplasjeve të ndodhura gjatë protestës së banorëve të fshatit Zvërnec, në zonën e njohur si “Portonovë”, ku ai u filmua duke goditur me grusht një protestues.

Menjëherë pas publikimit të pamjeve filmike, kreu i Policisë së Shtetit urdhëroi ngritjen e një grupi të posaçëm hetimor për të analizuar dhe hetuar të gjitha veprimet e ndodhura gjatë tubimit të zhvilluar më 30 maj 2026.

Nga veprimet hetimore u identifikua dhe u shoqërua punonjësi i sigurisë, shtetasi G. B., 32 vjeç, banues në Durrës. Në përfundim të veprimeve të para procedurale, ai u arrestua në flagrancë, i dyshuar për veprat penale “Heqja e paligjshme e lirisë” dhe “Plagosja e lehtë me dashje”.

Sipas Policisë, G. B. ka goditur me grusht shtetasin E. S. dhe më pas, në bashkëpunim me dy persona të tjerë, A. G. dhe G. V., të proceduar penalisht, e kanë tërhequr me forcë drejt ambientit të rezervuar për rojet e sigurisë, duke i shkaktuar dëmtime të lehta trupore.

"Identifikohet, kapet dhe arrestohet punonjësi i shoqërisë private të sigurisë së kantierit që goditi me grusht shtetasin E. S.

Ndërkohë, nis hetimi disiplinor për të gjithë zinxhirin komandues të DVP Vlorë. Menjëherë pas publikimit të pamjeve filmike ku shfaqet një punonjës i shoqërisë private të sigurisë duke goditur me grusht shtetasin E. S., Drejtori i Përgjithshëm i Policisë së Shtetit urdhëroi ngritjen e një grupi të posaçëm hetimor për të analizuar dhe hetuar të gjitha veprimet e ndodhura gjatë tubimit të zhvilluar më datë 30.05.2026 nga banorë të fshatit Zvërnec, në vendin e quajtur “Portonovë”.

Në vijim të veprimeve hetimore, u bë identifikimi dhe shoqërimi i punonjësit të shoqërisë private të sigurisë, shtetasit G. B., 32 vjeç, banues në Durrës, i cili, në përfundim të veprimeve të para hetimore, u arrestua në flagrancë, i dyshuar për veprat penale "Heqja e paligjshme e lirisë" dhe "Plagosja e lehtë me dashje".

Ky shtetas ka goditur me grusht shtetasin E. S. dhe më pas, në bashkëpunim me shtetasit A. G. dhe G. V. (të dy të proceduar penalisht), e kanë tërhequr me forcë drejt vendit të rezervuar për rojet, duke i shkaktuar dëmtime të lehta trupore.

Ndërkohë, paralelisht me veprimet hetimore, Drejtori i Përgjithshëm ka urdhëruar Drejtorinë e Standardeve Profesionale në Policinë e Shtetit për nisjen e menjëhershme të hetimit disiplinor për të gjithë zinxhirin komandues të DVP Vlorë, në lidhje me masat dhe menaxhimin e tubimit të zhvilluar ditën e djeshme.

Policia e Shtetit është e vendosur të respektojë të drejtat dhe liritë themelore të qytetarëve, të garantojë sigurinë e jetës dhe të pronës, si dhe të ndëshkojë çdo punonjës policie që neglizhon detyrën apo abuzon me të", njofton policia./ CNA