Gjendja shëndetësore e 14-vjeçarit/ Spitali i Traumës: S'ka asnjë komplikacion...

28 Nëntor 2024, 15:31, Aktualitet CNA

Gjendja shëndetësore e 14-vjeçarit/ Spitali i Traumës:

Spitali Universitar i Traumës

Spitali Universitar i Traumës ka reaguar në lidhje me shërbimin mjekësor të dhënë ndaj të miturit që u plagos në sherrin mes adoleshentëve në Tiranë, ku mbeti viktimë 14-vjeçari M. C.

Spitali i Traumës deklaron se 14-vjeçarit, shok me viktimën, i është dhënë shërbimi në Urgjencën e Traumës dhe më pas është shtruar në pavionin e Kirurgjisë së Përgjithshme.

Në deklaratë thuhet se përveç kujdesit mjekësor intensiv, pacienti ka marrë mbështetje psikologjike edhe nga psikologët, si dhe ka filluar trajtimin fizioterapik.

Spitali i Traumës thekson se gjendja e pacientit paraqitet e mirë dhe deri tani nuk ka pasur asnjë komplikacion që të kërkojë ndihmë shtesë ngasa ofrohen në shtet.

Kujtojmë se babai i të plagosurit ka hapur një llogari në "GoFundMe", ku kërkon 80 mijë euro për trajtimin e djalit të tij.

Deklarata e plotë:

Informacion për interesin publik, nisur nga aludimet për mungesën e shërbimit ndaj pacientit 14 vjeçar i plagosur pranë Shkollës "Fan Noli":

Në lidhje me rastin e pacientit 14- vjeçar i cili ka mbërritur në Spitalin Universitar të Traumës më 18 nëntor, dëshirojmë të bëjmë me dije se ekipi mjekësor i Pranim Urgjencës i ka dhënë pacientit shërbimin mjekësor të nevojshëm dhe pas stabilizimit të gjendjes fillestare ai është shtruar për të vazhduar trajtimin në pavionin e Kirurgjisë së Përgjithshme.

Përveç kujdesit mjekësor intensiv, pacienti ka marrë edhe mbështetje psikologjike nga psikologët. Gjatë qëndrimit në spital, ndaj 14- vjeçarit janë ndjekur të gjitha protokollet mjekësore për trajtimin fizik dhe psikologjik, dhe gjendja e tij është përmirësuar ndjeshëm.

Në momentin që ka qenë i nevojshëm dhe i mundur, pacienti ka filluar trajtimin fizioterapik, i cili është në vijim dhe ka dhënë rezultate pozitive. Aktualisht, gjendja e pacientit paraqitet e mirë dhe deri tani nuk ka pasur asnjë komplikacion që të kërkojë ndihmë jashtë mundësive të ofruara nga Spitali Universitar i Traumës.

Mirënjohje për ekipin mjekësor dhe të gjithë specialistët që po ndihmojnë në përmirësimin e gjendjes së pacientit dhe sigurojmë publikun që Spitali Universitar i Traumës vazhdon të ofrojë kujdes mjekësor të specializuar dhe gjithëpërfshirës për të gjithë pacientët./ CNA