Edi Rama: Diaspora, forcë kyçe në rrugën e Shqipërisë drejt zhvillimit

14 Prill 2026, 10:15, Aktualitet CNA

Edi Rama: Diaspora, forcë kyçe në rrugën e

Në fjalën e tij në Samitin e Diasporës në Tiranë, kryeministri Edi Rama theksoi rolin e rëndësishëm të diasporës në zhvillimin dhe transformimin e Shqipërisë ndër vite.

Rama u shpreh se samiti i parë i diasporës shënoi një moment të rëndësishëm ritakimi mes Shqipërisë dhe bijve të saj, në një kohë kur vendi ishte i rilindur, por ende me plagë të hapura. Sipas tij, ky ishte hapi i parë për të bashkuar energjitë dhe për të ecur drejt një të ardhmeje më të fortë.

Ai theksoi se sot Shqipëria ndodhet në një fazë të re, ku lidhja me diasporën është kthyer në bosht të zhvillimit, duke e bërë atë jo vetëm pjesë emocionale, por edhe aktive të vendit, përfshirë edhe përmes ushtrimit të së drejtës së votës.

Kryeministri nënvizoi gjithashtu transformimin e imazhit të Shqipërisë në arenën ndërkombëtare. Nga një vend që dikur shihej me dyshim, sot, sipas tij, Shqipëria identifikohet me natyrën, diellin dhe mikpritjen, ndërsa emri i saj njihet dhe respektohet globalisht.

Në aspektin ekonomik, Rama solli në vëmendje rritjen e ndjeshme të treguesve: prodhimi i përgjithshëm kombëtar nga më pak se 10 miliardë euro ka arritur në 27 miliardë euro, me synimin për të kapur 35 miliardë euro deri në fund të dekadës. Po ashtu, ai përmendi rritjen e të ardhurave për frymë dhe zhvillimin e turizmit, ku Shqipëria ka kaluar nga 2 milionë në 12 milionë vizitorë në vit, si dhe rritjen e investimeve të huaja.

Në përfundim, Rama e cilësoi diasporën si një partner të domosdoshëm në rrugën e Shqipërisë drejt zhvillimit dhe integrimit evropian.

“Mjafton të kthejmë kokën pas në kohën kur filluam punën për samitin e parë të diasporës, për të marrë forcë për të filluar punën kolosale që kemi nisur. Ky ishte një moment ritakimi me një vend të rilindur, por plot plagë të hapura. Ishte hapi i parë për të thirrur fuqinë e diasporës dhe për t’u ndjerë më të fortë, për të shkuar drejt majës ku sot jemi më afër se kurrë ndonjëherë. Ishte një bisedë e ndërprerë mes Shqipërisë dhe bijve të saj. Sot jemi në fazën e ndërtimit të asaj që ka qenë boshti i rrugës sonë, lidhjen me ata në fund të botës, ku dielli lind andej nga perëndon.

Ishte një kërkesë themelore për të qenë jo vetëm pjesë emocionale e këtij vendi, por edhe pjesë aktive e tij. Sot vini këtu pasi e keni ushtruar të drejtën e votës.

Nga një zë që kërkohej të dëgjohej, sot është një zë që dëgjohet për udhëheqjen e këtij vendi.

Sot ju jeni kryelartë kudo dhe kurdoherë emri i vendit tonë thirret me vëmendje. Emri i Shqipërisë ka kaluar një transformim të thellë: nga një sinonim i të keqes, Shqipëria është bërë sinonim i natyrës, diellit dhe mikpritjes.

Nga një emër që shpesh duhej shpjeguar se ku binte në hartën e botës, sot Shqipëria është një emër që flet vetë në të gjitha gjuhët e botës.

E nisëm rrugëtimin tonë me një prodhim të përgjithshëm kombëtar më pak se 10 miliardë euro; sot është 27 miliardë euro dhe në fund të kësaj dekade synojmë ta çojmë në 35 miliardë euro. Sot jemi mbi 11 mijë euro në vit, dhe në vitin 2030 synojmë të jemi mbi 15 mijë euro në vit. E nisëm rrugëtimin tonë me 2 milionë turistë; sot Shqipëria ka 12 milionë turistë dhe ka kaluar 1.6 miliardë euro investime të huaja në vit”, tha Rama./ CNA