E fundit!

12:20 Aktualitet

EKSKLUZIVE/ Ja kandidatët për postin e nëndrejtorit në Policinë e Shtetit

CNA ka zbuluar ekskluzivisht se cilët do të jenë kandidatë...

Dita e Theofanisë/ Kryepiskopi Joan: Të reflektojmë dhe të ndjekim rrugën shpirtërore që Krishti na ka treguar

6 Janar 2026, 12:31, Aktualitet CNA

Kryepiskopi i Tiranës, Durrësit dhe Gjithë Shqipërisë, Fortlumturia e Tij, Imzot Joani ndau sot një mesazh në Ditën e Theofanisë.

Në predikimin e tij nga Kisha e Apostull Pavlit dhe Shën Astit në Durrës, Kryepiskopi u ndal te rëndësia e festës së sotme që përkujton shfaqjen e Perëndisë.

Kryepiskopi theksoi se mesazhi më i madh në këtë ditë është reflektojmë mbi pagëzimin, kuptimi i misterit të Trinisë dhe ndjekja e rrugës shpirtërore që Krishti i ka treguar njerëzimit.

“Sot festojmë Theofaninë, një nga festat më të rëndësishme të Kishës Ortodokse. Vetë fjala 'Theofani' ose 'Epifani' shpjegon kuptimin e kësaj feste, që do të thotë shfaqja e Perëndisë ose shfaqja e Lartësisë. Të dielën që kaloi folëm për përgatitjen e kësaj feste dhe për rëndësinë e saj shpirtërore.

Çfarë do të thotë kjo festë për ne sot? Në kishë nuk kujtojmë vetëm ngjarje historike; koha liturgjike nuk është njësoj si koha kronologjike e sekondave, minutave apo viteve. Koha liturgjike është një kohë e veçantë, një mundësi për të pasur një takim me dimensionin hyjnor, ashtu siç ndodh shpesh edhe në art, kur një poet frymëzohet dhe krijon. Kjo kohë na lejon të hyjmë në një dimension tjetër dhe të ndiejmë praninë e Perëndisë në shpirtin tonë. Sa më shumë përgatitemi shpirtërisht përmes lutjes, agjërimit dhe leximeve, aq më shumë bëhemi të aftë për të ndier këtë prani.

Sot përkujtojmë ardhjen e Zotit në Jordan dhe pagëzimin e Tij, një ngjarje me rëndësi të madhe për secilin prej nesh. Nuk është vetëm kujtim i pagëzimit të Zotit, por një meditim mbi pagëzimin tonë. Edhe pse shumë prej nesh janë pagëzuar, pagëzimi është fillimi i një udhëtimi shpirtëror. Nëse nuk vazhdojmë këtë udhëtim, pagëzimi nuk mund të sjellë fryte. Zoti u pagëzua edhe pse nuk kishte nevojë, për të plotësuar çdo drejtësi dhe për të pastruar gjithë botën – dobësitë, papastërtitë dhe mëkatet tona.

Pagëzimi i Johanit ishte vetëm me ujë të jashtëm, ndërsa pagëzimi i Krishtit e tejkalon këtë: ai na tregon se duhet të pagëzohemi me frymë, me ujin e gjallë të shpirtit të Shenjtë. Në pagëzimin e Zotit shfaqet Trinia e Shenjtë – Ati, Biri dhe Shpirti i Shenjtë – një mister hyjnor që shpesh është i vështirë për t’u kuptuar me logjikën tonë, por që besimi na lejon ta përjetojmë.

Krishti, Biri i Perëndisë, u bë njeri si ne, plotësoi gjithçka që njerëzit duhej të bënin dhe tregoi rrugën për shpëtimin tonë. Pagëzimi i Tij nuk ishte vetëm një akt simbolik, por një prekje për gjithë njerëzimin. Fjala 'ortodoksi' do të thotë adhurimi i drejtë – adhurimi i Zotit që na është shfaqur dhe që mund të kuptohet deri ku shkon mendja jonë.

Ky është mesazhi i Theofanisë: të reflektojmë mbi pagëzimin tonë, të kuptojmë misterin e Trinisë dhe të ndjekim rrugën shpirtërore që Krishti na ka treguar”,-tha Kryepiskopi./CNA