web counter
LEXO PA REKLAMA!

SHKARKO APP

App Store
Google Play

E fundit!

x

ECPAT Europë: Duhet të mbrojmë jetën e fëmijëve në Ukrainë nga lufta dhe pasojat e saj

7 Mars 2022, 13:13, Aktualitet CNA

EUROPA?Bota është tronditur nga sulmi i paprovokuar dhe i pajustifikuar ndaj Ukrainës dhe popullit të saj. Kjo luftë ka sjellë jo vetëm humbjen e jetëve të shumë qytetarëve, mes tyre edhe fëmijë, por edhe shpërnguljen masive të familjeve nga shtëpitë e tyre, teksa përpiqen t’i shpëtojnë armiqësive. Sipas të dhënave të UNHCR-së, të paktën një milion e gjysmë njerëz janë aktualisht të strehuar në vendet në kufi me Ukrainën.

Vlerësimet e Kombeve të Bashkuara dhe organizatave të tjera të refugjatëve e vendosin numrin e njerëzve që ikin nga pushtimi aktual në 4 deri në 7 milionë. Të paktën 36 fëmijë janë vrarë, sipas të dhënave të fundit nga Ministria e Shëndetësisë e Ukrainës.

Të gjithë anëtarët e ECPAT në Evropë që i janë bashkuar kësaj deklarate, duke punuar në nivel kombëtar dhe ndërkombëtar për t’i dhënë fund shfrytëzimit seksual dhe trafikimit të fëmijëve, janë thellësisht të shqetësuar për rreziqet, duke përfshirë dëmtimin fizik, humbjen e jetës, humbjen e familjes, shqetësimin e rëndë emocional, humbjen të shkollimit dhe arsimit, dhe mungesës së strehimit të sigurt, me të cilin përballen fëmijët aktualisht në Ukrainë ose gjatë arratisjes nga sulmi.

Qasja e tyre në ushqim, ujë, strehim, kujdes mjekësor, mbështetje psikosociale po kërcënohet seriozisht nga lufta. Kjo luftë përbën një kërcënim të paprecedentë për të gjithë të prekurit, veçanërisht për më të cenuarit në shoqëri ? fëmijët.

Në çdo konflikt, fëmijët mbeten ata që durojnë pjesën më të madhe të dëmtimit fizik dhe emocional. Jemi thellësisht të shqetësuar për dhunën ndaj të cilës ata po ekspozohen. Jemi të tmerruar nga shkeljet e të drejtave të tyre sipas Konventës së OKB-së për të Drejtat e Fëmijëve (KDF).

E drejta ndërkombëtare humanitare kërkon që të gjithë të mbrojnë jetën e civilëve. KDF e OKB-së kërkon gjithashtu që shtetet të marrin të gjitha masat e mundshme për të siguruar mbrojtjen dhe kujdesin e fëmijëve që janë prekur nga një konflikt i armatosur.

Të drejtat e tyre duhet të respektohen. Që nga fillimi i kësaj lufte, organizatat tona anëtare dhe aleatët në Ukrainë, Poloni, Rumani, Hungari, Moldavi dhe në mbarë Europën kanë mbështetur mijëra fëmijë dhe familje ukrainase që ikin nga lufta dhe kërkojnë mbrojtje.

Sipas raportimeve nga terreni nga anëtarët tanë, mes refugjatëve ka shumë fëmijë të pashoqëruar. Në kaos, ka mungesë informacioni për fëmijët e zhdukur në Ukrainë apo në vendet fqinje. Fëmijët e pashoqëruar dhe të zhdukur janë veçanërisht të cënueshëm ndaj trafikimit, abuzimit dhe shfrytëzimit seksual. Siguria dhe mbrojtja e tyre duhet të jetë prioritet!

Anëtarët e ECPAT Europë që i janë bashkuar kësaj deklarate, u bëjnë thirrje qeverive anembanë Europës, Komisionit Europian, OSHC-ve dhe misioneve humanitare që të ndërmarrin veprime të menjëhershme për të identifikuar dhe vendosur urgjent fëmijët e pashoqëruar në mjedise të sigurta, miqësore për fëmijët dhe të mbikëqyrur, me akses të plotë në mbrojtjen e fëmijëve, shërbimet shëndetësore, arsimore dhe psiko-sociale, duke përfshirë caktimin e menjëhershëm të një kujdestari dhe rivendosjen e shpejtë të kontaktit me prindërit e tyre dhe kujdestarët e tjerë./CNA.al





Lajmet e fundit nga