Bundesliga gjermane/ Bayern turpërohet nga Bochum, fitojnë Gladbach e Wolfsburg

12 Shkurt 2022, 16:31, Sport CNA

Bochum ka surprizuar në shtëpi Bayernin duke e mposhtur me rezultatin turpërues 4-2. Mjaftoi vetëm një pjesë për vendasit që të shënonin katër herë në portën e kampionëve në fuqi, për të dalë nga ky takim jo vetëm me tre pikët, por edhe me lavdinë e rezultatit.

Lewandowski krijoi idenë se do të ishte një ndeshje e lehtë për Bayernin, kur zhbllokoi rezultatin e takimit në minutën e 9. Megjithatë, gjithçka u baraspeshua në minutën e 14-të nga Antwi-Adjei.

Një penallti e Locadia kaloi vendasit në avantazh për herë të parë në këtë ndeshje, ndërsa në gjashtë minutat pasuese Bayerni u ndëshkua edhe dy herë të tjera.

Goli i dytë i Bayernit u shënua sërish nga Lewandowski që thjesht shtoi shifrën personale të golave të shënuar, pasi nuk e ndryshoi rrjedhën e ndeshjes.

Monchengladbach është rikthyer te fitorja pas tre ndeshjes, pasi mposhti në shtëpi Augsburg me rezultatin 3-2. Ishte Kone ai që zhbllokoi rezultatin në pjesën e parë, ndërkohë që në pjesën e dytë u shënuan edhe tre gola të tjerë.

Hofmann dyfishoi gjithçka, përpara se Iago të ngushtonte sërish diferencat. Golin që vulosi fitoren e realizoi Bensebaini në minutën e 67-të, ndërsa rezultati u ngushtua sërish nga Finnbogason në minutat e fundit të takimit.

Wolfsburg duket sa ka dalë nga kriza e rezultateve pasi gjeti fitoren e dytë radhazi në Bundesliga. Ata mposhtën me rezultatin 2-0 Eintrachtin e Frankfurtit falë golit të Kruse me 11-metërsh dhe Lukebakio në fundin e takimit.

Freiburg dhe Mainz kanë ndarë nga një pikë në sfidën që përfundoi me rezultatin 1-1. Ishte Mainz që kaloi i pari në avantazh më anë të Hack, por Petersen baraspeshoi gjithçka për të rivendosur paqen në këtë takim.

Greuther Furth i vendit të fundit mposhti Hertha Berlin me rezultatin e ngushtë 2-1. Dygolëshi i Hrgota mjaftoi për vendasit që të dilnin me tre pikë nga ky takim, pavarësisht faktit se Gechter ndryshoi diferencat.

BUNDESLIGA ? JAVA 22
Bochum-Bayern Munich 4-2
Shënues: Antwi-Adjei 14?, Locadia (pen) 38?, Gamboa 40?, Holtmann 44? / Lewandowski 9?, 75?

Monchengladbach-Augsburg 3-2
Shënues: Kone 30?, Hofmann 46?, Bensebaini 67? / Iago 55?, Finnbogason 90+3?

Eintracht Frankfurt-Wolfsburg 0-2
Shënues: Kruse (pen) 28?, Lukebakio 90+3?

Freiburg-Mainz 1-1
Shënues: Petersen 69? / Hack 31?

Greuther Furth-Hertha Berlin 2-1
Shënues: Hrgota 1?, 71? / Gechter 82?