Harta, Shqipëria e vetmja në Europë me rritje të aviacionit civil në raport me parakrizën, në gusht

6 Gusht 2021, 10:52, Aktualitet CNA

Shqipëria, së bashku me Ukrainën janë të vetmet shtete që raportohen se kishin rritje të vendeve të zëna në avion në fillim të gushtit, në krahasim me periudhën e parakrizës së pandemisë.

Të dhënat bëhen të ditura në një hartë të publikuar nga Bloomberg, ku raportohet kapaciteti i vendeve në tregun e aviacionit civil në raport me 2019-n. Të dhënat masin kapacitetin e fluturimeve për javën e 2 gushtit, në krahasim me të njëjtën periudhë të 2019-n.

Për Shqipërinë, rritja e raportuar është rreth 25%.

Ndërkohë, në të gjithë botën, kapaciteti global i vendeve në tregun e aviacionit civil është sa 68% e 2019-s. Pjesa më e madhe e shteteve të Europës janë rreth 25% më poshtë se nivelet e parakrizës.

Bloomberg shkruan se gjithsesi Europa, një shtet që ishte mbrapa me vaksinimin në fillim, e ka përmirësuar ritmin në javët e fundit.

Sipas Bloomberg, nga Gjermania në Spanjë në Mbretërinë e Bashkuar, hapja e kufijve dhe lehtësimi i kërkesave të karantinës po ndihmojnë sërish në mbushjen e aeroplanëve. Rajoni ka pasur një ecuri pozitive që nga fundi i prillit, kur kapaciteti ishte vetëm një e treta e niveleve të para-pandemisë. Linjat ajrore në Europë tani po operojnë me 66% të kapacitetit të 2019, sipas gjurmuesit javor të fluturimeve të Bloomberg, i cili përdor të dhëna nga specialisti i aviacionit OAG për të monitoruar ritmet e rikthimit.

Tregu i aviacionit në Shqipëri

Të dhënat e fundit kombëtare të INSTAT, deri në muajin qershor, tregojnë se në 6-mujorin e parë 2021, transporti i pasagjerëve përmes ajrit ishte sa 53% e të njëjtës periudhë të 2019-s.

Gushti, sipas Bloomberg ka sjellë më shumë frymëmarrje për industrinë vendase, teksa në këtë periudhë ka një rritje të kërkesës për shkak të turizmit dhe lëvizjeve të emigrantëve.

Sipas Autoritetit të Aviacionit Civil (ACA), në muajin prill, operatori hungarez me kosto të ulët, Wizz Air zotëronte 33% të tregut të fluturimeve sipas numrit të pasagjerëve. Që prej hyrjes së saj pak vite më parë, kompania u zgjerua me shpejtësi, duke shtuar numrin e destinacioneve edhe gjatë periudhës së pandemisë. Aktualisht kompania fluturon në 32 destinacione në 11 shtete.

Operatori i dytë është Air Albania, me një pjesë të kapitalit shtetëror, me 24% të tregut, e ndjekur nga Albawings me 8%, Alitalia me 7% ndërsa të tjerat kanë më pak se 5%./ Monitor