Humbje e madhe për bluzat e bardha/ Kush ishte mjeku Korçar që u gjet i pajetë në Rradhimë

12 Korrik 2021, 14:11, Aktualitet CNA

Kujtim Shabani, mjeku i dashur i të gjithë qytetarëve korçarë. Mjeku që jepte shpirtin e tij për pacientët, sot ndahet nga jeta tragjikisht në moshën 49 vjeçare. Dhimbje e madhe për Korçën, për familjen, për miqtë dhe kolegët, lajm i kobshëm që ka hapur plagë tek te gjithë ata që patën fatin ta njihnin e ta kishin mik doktor Kujtimin. Doktor Kujtimi ka nisur rrugën e mjekësisë në vitin 1986, duke ndjekur shkollën e mesme profesionale për infermieri. E në vitin 1990 ai fillon studimet për mjekësi në Fakultetin e Mjekësisë në Tiranë, në degën e mjekësisë së përgjithshme. Pas përfundimit të studimeve, ai punoi për 9 vite si mjek familje në zonën e Devollit. Doktor Kujtimi prej 16 vitesh ushtronte profesionin pranë spitalit të Korçës, ku në vitin 2005 u emërua mjek në Shërbimin e Urgjencës të Spitalit Rajonal të Korçës dhe pas disa vitesh u emërua në krye të këtij shërbimi. Gjithashtu, ai zotëronte disa gjuhë të huaja.

Kujtim Shabani nuk hoqi dorë për asnjë moment për të gjithë pacientët që merrnin shërbim prej tij, ishte mjeku që gjendej në çdo orë të ditës dhe natës, mjeku që interesohej me përpikmëri për çdo pacient të tij. Periudha e Covid-19 gati 2 vjeçare ka qenë më e vështira për të gjithë të prekurit, por ka qenë doktor Kujtimi ai që ua lehtësonte dhimbjet çdo pacienti, me durim e përkushtim të madh, duke komunikuar dhjetra herë në ditë për gjendjen shëndetësore të secilit, duke i këshilluar dhe mbështetur deri në përfundimin me sukses të kurave kundër virusit. Falë aftësisë dhe trajtimit që Kujtimi u ka bërë qindra pacientëve të prekur, shumë prej tyre gëzojnë shëndet të plotë.

Doktor Kujtimi ishte pjesë e komunitetit rom, gjatë gjithë jetës së tij është angazhuar në mbrojtjen e të drejtave të këtij komuniteti, duke qenë aktiv në promovimin e tyre. Vetë Kujtimi është ai njeri që ka treguar vlerat e tij kudo dhe kurdo herë, me humanitetin në shpirt, me aftësitë e mëdha, me përkushtimin e pakufi. Pasioni i tij ishte specializimi në degën e neurologjisë, por ky pasion dhe ëndërr e tij u pre në mes. Doktor Kujtimi ishte i martuar, dhe la pas bashkëshorten dhe dy fëmijët e tij, një vajzë dhe një djalë.

Me vdekjen e tij, Spitali i Korçës ka humbur një prej vlerave të mjekësisë, njeriun më human të bluzave të bardha. Korça ka humbur njeriun më të dashur, që do të mbahet mend gjithë jetën për humanizmin dhe karakterin e tij të pastër./ CNA.al