Kreu i LRE Arian Galdini sfidon me risinë elektorale, "Foli Pasqyrës"

28 Mars 2021, 12:49, Politikë CNA

LRE, Lëvizja e Re vijon fushatën elektorale duke prezantuar kandidatët dhe vizionin e saj politik si parti politike konkuruese në zgjedhjet e 25 prillit 2021.

Pasi ka prezantuar kandidatët kryesorë në Qarqet e Kukësit, Durrësit, Vlorës dhe Fierit, LRE ka mbledhur ditën e sotme në Selinë e saj Qendrore në Tiranë, të gjithë Kordinatorët Politikë dhe Kryesuesit e Listave të Kandidatëve për Deputetë në të gjithë vendin, për të zhvilluar aktivitetin novator dhe sfidues me tematikë: “Foli Pasqyrës”. LRE vjen me këtë risi elektorale duke sfiduar shqiptarët që të kërkojnë vetveten dhe ta nisin e kërkojnë ndryshimin tek vetvetja e nga vetvetja.

Gjatë këtij aktiviteti, Kryetari i LRE Arian Galdini iu përgjigj edhe Kryeministrit Edi Rama për ironinë e tij nga Kruja me nr 8. Galdini tha:

” Kryeministri i Mbretërisë së Kujtim Gjuzit dhe arkitekti i Demokracisë TurBushiste dje nga Kruja vijoi me fushatën e tij denigruese e negativiste ndaj kujtdo që ai e ka përballë në zgjedhjet e 25 prillit. Iu desh një skenar me menu picerie për të bërë batuta prej Dreri Trotuaresh nga ato të brezit që uleshin bordurave, hanin fara dhe dëgjonin muzikë jugosllave dhe u dukej vetja më ndryshe, më lart e më modernë se të tjerët.

Edi Rama në skenarin e tij të djeshëm në picerinë e Krujës, dha mesazhin se zgjedhja e Milvës për Nr 1, i cili përkon me Nr e Tom Doshit, është zgjedhje e pranueshme. Porse zgjedhja e Nr 8 është e patolerueshme. Gjithë skenari bullist i Edi Ramës, me pyetjen: “Kush është Nr 8, more, Kujtim Gjuzi”.., siç duket ka ardhur si ngacmim direkt i rritjes së LRE. Edi Rama e di shumë mirë se Nr 8 është LRE. Dhe ne e dimë mirë të gjithë se asnjë mesazh gjatë fushatës elektorale nuk është i rastësishëm e as sporadik.

Sidomos kur ka një kujdes të posaçëm që mesazhi të pasqyrohet në kryetituj gazetash e portalesh. Tallja dhe përpjekja e Edi Ramës për të qesharakëzuar Nr 8 dhe LRE, me shumë gjasa vjen si rezultat i një shqetësimi serioz që po i shkaktohet Rregjimit Skuthokratik nga rritja e përditshme e LRE. Por i kujtojmë Edi Ramës atë që e ka thënë Gandi shumë dekada më parë: Në fillim ata të shpërfillin, pastaj të tallin, pastaj të sulmojnë e në fund ti fiton.“/ CNA.al