Kur Gon Duka thotë: I doja të gjithë demokratët në PD

25 Shkurt 2021, 09:32, Politikë CNA

Gon Duka u rehatua!

Dhe fjalia e parë që tha në “Open” ishte: “Unë do të jem i dyti në listat e koalicionit me PD-në”.

I analizojmë pak me radhë secilën fjalë që përbën fjalinë e gëzueshme të Gonit.

Goni tha: “unë” sepse Goni është tek-pullë, ndaj nuk flet për partinë e vet. E vetmja gjë që di Goni është që ka blerë një plaçkë dikur dhe që sot ajo plaçkë (që për të quhet Partia Agrare), e bën Gonin një “UNË”.

Goni tha: “do të jem”, sepse ca si këta blerësat e partive, qëllojnë rregullisht biznesmenë që e vetmja gjë që kërkojnë është të jenë. Pastaj lojën e bëjnë rrugës. Si fillim duhet të jenë, dhe sigla që blenë u duhet veç për kaq. Pastaj leku e hedh ujin përpjetë.

Goni tha: “i dyti” sepse Goni di për çfarë ka negociuar! Goni di edhe me shumë sigurisht për çmimin e negociatave të veta. Por Goni do që të sigurohet mirë që do jetë i dyti në listën e Durrësit. Ja tha të gjithëve që te sigurohej (kshu beson Goni se bohet), që Luli do e dëgjonte që Goni e tha. Kështu që Luli mo mrapa mos boj nai loj e ti dali llafit. Ja tha dhe Bylykbashit me atë rast Goni, meqë ishte ngjit me të e që sipas kësaj llogarie zbret të paktën në vendin e katërt të listës në Durrës. Kjo sa kohë që i pari është Paloka dhe i treti duhet të jetë me flokë me model të ndryshëm nga modeli i flokëve të Bylykbashit!

Goni tha: “në listat e koalicionit” dhe buzeqeshi pak. Kodi i ri zgjedhor ja ka dhënë mundësinë Gonit që mos thotë më, “në listat e PD”. Ja ka ngrejt shumë pjacën Gonit Kodi. Tashi Goni, që “unë” ishte e “unë” mbeti, nuk quhet më si i futur te listat e PD, por te listat e koalicionit me PD. Ka hec shum Goni.
Goni ësht anëtar koalicioni tashi!

Goni tha: “me PD”. Kaq di Goni. Pavarsisht që Luli plasi duke thënë koalicion me 14 parti, Goni di PD-në. Të tjerët s’i njef e nuk i duhen. Ata të tjerët janë si ai. Janë “unë” secili, janë përgjithësisht “i dyti”, dhe edhe ata si ai, tani nuk janë më në listë të PD, por jan rritur e janë bërë si ai “në listë koalicioni me PD”!

Veçse ajo që emocionon më shumë në fjalitë e Gonit, pas fjalisë së parë drithëruese, është dëshira e shprehur nga Goni dhe ëndërra e tij që gjithë demokratët duhet të ishin bashkë në listat e PD!

Sigurisht ata nuk janë dot “unë” si Goni, nuk janë dot “në koalicion me PD-në” dhe sidomos nuk mund të jenë “i dyti”.

Por Goni ka ëndërra! Ai është i dyti. Demokratët le të mbushin listat pastaj. Goni Lulit i duhet për këtë punë. Le ta gëzojnë njëri-tjetrin!/CNA.al