E fundit!

18:12 Aktualitet

Zjarr në unazën jugore të Elbasanit/ Shpërthime gjatë operacionit për shuarjen e flakëve

Një zjarr ka përfshirë pasditen e sotme një sipërfaqe tokë...

Ja si lidhen bakteret e zorrëve me shëndetin mendor

14 Shkurt 2021, 14:43, Blog CNA

Që të gjithë njerëzit kanë baktere që banojnë në aparatin e tyre tretës. Por shkencëtarët po zbulojnë tani prova se përbërja e këtyre popullatave mikrobiale, ka lidhje me shëndetin mendor. Një studim i ri zbuloi se njerëzit me simptoma të ankthit dhe depresionit, kishin tendencën të ndryshonin nga të tjerët në sasinë e llojeve të caktuara të mikrobeve në zorrë.

Shkencëtarët kanë studiuar se si funksionon trupi i njeriut prej mijëra vjetësh, megjithatë ka ende shumë elementë që ne nuk i kuptojmë plotësisht.

Studimi i fundit rishikoi 26 studime, që kanë analizuar mikrobet e zorrëve tek njerëzit me simptoma të ankthit dhe depresionit, dhe i krahasojnë ato me mikrobet e zorrëve të pjesëmarrësve të shëndetshëm. Rishikimi zbuloi prova të qarta se njerëzit që përjetojnë ankth dhe depresion, ka më shumë të ngjarë të kenë lloje bakteresh në traktet e tyre të tretjes që nxisin inflamacionin.

Përveç kësaj, njerëzit që vuajnë nga ankthi dhe depresioni, kishin më pak mikrobe që prodhonin acide yndyrore me zinxhir të shkurtër, të cilat besohet se rregullojnë sistemin nervor qendror. Por shkencëtarët nuk i kuptojnë ende mekanizmat sesi ndodh kjo gjë.

Por ka të dhëna se disa baktere në traktin tretës stimulojnë nervin vagus, që kontrollon gjendjen shpirtërore, përgjigjen imunitare, tretjen dhe rrahjet e zemrës. Dhe ata besojnë se bakteret e tjera sekretojnë molekula që udhëtojnë përmes qarkullimit të gjakut për të arritur në tru. Studiuesit besojnë se ekzistojnë edhe lidhje indirekte.

Disa prova sugjerojnë që inflamacioni është një faktor kryesor në çrregullimet e shëndetit mendor, dhe se kombinime të caktuara të mikrobeve në zorrë e nxisin inflamacionin. Ndërkohë, disa hulumtime tregojnë gjithashtu se nënproduktet e sekretuara nga mikrobet e zorrëve, shkaktojnë çlirimin e neurotransmetuesit serotonin (i njohur si një ndihmës në stabilizimin e humorit), që del nga zorra dhe udhëton në të gjithë trupin.

Ajo që dinë deri më tani shkencëtarët është se lidhjet midis baktereve të zorrës dhe shëndetit mendor janë të shumta. Për shembull, pacientët me skizofreni që trajtohen me një antibiotik që dihet se vret baktere specifike në zorrë, kishin më pak simptoma psikotike pas marrjes së ilaçit.

Në një studim tjetër, shkencëtarët transferuan mikrobet e zorrëve nga pjesëmarrësit njerëzorë që përjetonin depresion, tek minjtë e shëndetshëm, dhe më pas zbuluan se minjtë filluan të përjetonin vetë simptoma serioze të depresionit.

Gjithsesi nuk ka ende të dhëna të mjaftueshme, për të sugjeruar një trajtim specifik në lidhje me mikrobiomën e zorrëve për shëndetin mendor. Por studimet kanë vërejtur se njerëzit që konsumojnë më shumë fruta, perime, peshk dhe drithëra integrale e zvogëlojnë rrezikun e tyre për t?u prekur nga depresioni.

Megjithëse studimi i fundit nuk ekzaminon në mënyrë specifike mikrobiomën, është e qartë se ajo që hamë ndikon në mikroorganizmat në sistemin tonë të tretjes. Tani për tani, mesazhi që duhet marrë nga ky studim është se pasja e një diete ushqimore të shëndetshme e të ekuilibruar, përmirëson jo vetëm shëndetin tuaj fizik, por ka të ngjarë të forcojë edhe shëndetin tuaj mendor./ Përshtati në shqip CNA.al