E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Anketimi për klimën synon të arrijë një konsensus global

31 Janar 2021, 21:59, Politikë CNA

Pothuajse dy të tretat e njerëzve besojnë se ndryshimi klimatik është një emergjencë globale sipas një studimi të kryer nga Programi i Kombeve të Bashkuara për Zhvillim (UNDP). Ky anketim, i cili thuhet të jetë “më i madh në botë” i opinionit publik mbi ndryshimin e klimës, tregon mbështetjen e njerëzve për marrjen e masave të gjera.

“Sjell vërtet zërin e njerëzve në këtë moment kur udhëheqësit botërorë po marrin vendime të mëdha për të ardhmen tonë kolektive”, thotë Cassie Flynn, këshilltare strategjike e UNDP-së për ndryshimin e klimës. “Përmes anketimit jemi përpjekur të ndihmojmë të sjellim zërat e njerëzve në këtë debat, në një mënyrë që nuk është bërë ndonjëherë më parë”.

Në mënyrë që të kontaktohej audienca e vështirë për t’u arritur, përfshirë personat nën 18 vjeç, pyetjet e sondazhit u shpërndanë përmes reklamave në aplikacionet e lojërave në celularë.

Megjithë pandeminë COVID-19, pothuajse dy të tretat (64 për qind) thanë se ndryshimi i klimës është një emergjencë globale.

“Më e rëndësishmja është se njerëzit me të vërtetë duan të bëjnë diçka për këtë”, thotë zonja Flynn. “Kjo është ajo që është kaq e rëndësishme në lidhje me këtë sondazh. Është shkuar një hap më tej sesa sondazhet tradicionale duke i pyetur njerëzit – si doni të dalim nga kjo rrëmujë?”.

Katër politika klimatike rezultuan si opsionet më popullore ? mbrojtja e pyjeve dhe tokës; energji të rinovueshme nga dielli dhe era; teknika bujqësore që nuk dëmtojnë klimën; dhe më shumë investime në biznese të gjelbërta.

Anketimi përfshiu mbi gjysmë milioni njerëz nën moshën 18 vjeç.

U zbulua se të rinjtë kanë më shumë gjasa sesa grupmoshat e tjera të besojnë se ndryshimi i klimës është një emergjencë, dhe se sidoqoftë shumica e njerëzve më të moshuar janë dakord me ta.

“Është shumë interesante që brezat e tjerë nuk ishin shumë prapa”, thotë zonja Flynn. “Edhe tek brezi 60 vjeç që ruajnë qëndrimet më të ndryshme, 58 për qind e tyre mendojnë se ekziston një emergjencë klimatike dhe se duhet të bëjmë diçka për këtë”.

Në orët e tij të para në detyrë javën e kaluar, Presidenti Joe Biden nënshkroi një urdhër ekzekutiv për kthimin e Shteteve të Bashkuara në marrëveshjen e Parisit për klimën.

U shfuqizua kështu tërheqja nga Presidenti Donald Trump, i cili hodhi poshtë konkluzionet shkencore se ndryshimi klimatik shkaktohet nga njeriu.

Ekspertët thonë se çdo përpjekje ndërkombëtare për të mbajtur ngrohjen globale nën 2 gradë Celsius, mundësisht nën 1.5 gradë Celcius, siç është rënë dakord në marrëveshjen e Parisit, do të ishte e vështirë pa kontributin e Shteteve të Bashkuara, vendi i dytë në botë për çlirimin e gazeve karbonike.

Sondazhi i UNDP-së pretendon se 65 për qind e amerikanëve besojnë se ndryshimi i klimës është një emergjencë globale dhe 57 për qind mbështesin më shumë investime në biznese të gjelbërta.

“Jam vërtet e inkurajuar nga rezultatet. Kemi parë krahas shumë vendeve të tjera të pasura në botë një shtytje shumë të fortë drejt energjisë së rinovueshme, drejt bujqësisë së pastër, drejt mbrojtjes së natyrës”, thotë zonja Flynn.

Zonja Flynn shpreson se anketimi global do t’i ndihmojë udhëheqësit botërorë, përfshirë Presidentin Biden, ndërsa formulojnë dhe zbatojnë politikat e reja të klimës.

“Presidenti Biden po orientohet drejt energjisë së rinovueshme dhe vendeve të gjelbra të punës si një pjesë kryesore e planit të tij mbi ndryshimin e klimës. Shpresoj që ‘Votimi i Popullit për Klimën’ ta ndihmojë atë dhe udhëheqësit e tjerë të botës duke ua bërë të ditur se njerëzit janë me ta ndërsa marrin këto vendime të mëdha”, thotë zonja Flynn./ VOA