E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Deklarata e Manjola Cakonit/ Basha i kërkon llogari Ramës: Jepi fund teatrit

10 Shtator 2020, 16:34, Politikë CNA

Kryetari i Partisë Demokratike, Lulzim Basha, ka reaguar pas publikimit të videos së Manjola Cakonit, e cila ka humbur dy pjesëtarë të familjes në tërmetin tragjik të 26 nëntorit.

Basha ka publikuar deklaratën e Manjolës, ku thotë se kryeministri Edi Rama e ka kritikuar se kërkoi ndihmë. Kreu i opozitës thotë se teatri mizor me jetën dhe hallet e qytetarëve duhet të marrë fund.

Ai thekson se qeveria duhet të lehtësojë pasojat materiale për Manjolën, Alesion dhe për mijëra persona të tjerë, që u goditën rëndë nga tërmeti i 26 nëntorit.

?Historia e Manjolës dhe Alesios tronditi mbarë opinionin publik. Një tragjedi e madhe, dhimbje e pashërueshne që do të mbetet gjithmonë e pranishme në jetën e tyre. Detyra e një qeverie normale është të lehtësojë pasojat materiale për Manjolën, Alesion por dhe për mijëra persona të tjerë, që u goditën rëndë nga tërmeti i 26 nëntorit.

Por kjo që dëgjuam, kërcënimi i një zonje të mbytur nga dhimbja dhe pamundësia për të përmbushur nevojat jetike, është një akt i ulët i një kryeministri që shkel mbi çdo premtim, i dikujt që nuk e ndjen dhimbjen dhe vuajtjen e bashkëqytetarëve. Është akti i një burracaku që i kërcënon t’u mbyllë gojën viktimave të pushtetit të tij të korruptuar.

Është kriminale që fatkeqësia e bashkëqytetarëve tanë, në fillim u përdor për propagandë e më pas u harrua. Është kriminale që një kryeministër të kërcënojë një qytetare, vetëm pse ajo denoncoi shkeljen e premtimit dhe braktisjen e saj. Fatkeqësisht, Manjola është vetëm një ndër mijëra gra të tjera që sot nuk kanë ushqim të mjaftueshëm për fëmijët e tyre dhe që jetojnë në çadra e kushte tejet të vështira.

Historia e saj është dëshmi ngjethëse e humbjes së çdo ndjeshmërie njerëzore dhe çdo përgjegjësie ndaj njerëzve nga ai që i përdor qytetaret për propagandë e më pas i braktis në mjerimin e tyre?, shkruan Basha në rrjetet sociale./ CNA.al