Si ndodhi atentati ndaj Mirsad Metës/ Zbardhet dëshmia e vëllait të efektives

8 Shkurt 2020, 13:43, Kronika CNA

Zbardhet dëshmia e Ension Burakut, vëllait të efektives së policisë së Durrësit Ornela Burakut, për atentatin në mes të Shkodrës ndaj Mirsad Metës.

Mësohet se Buraku e ka marrë përsipër të gjithë fajin për atetatin ku mbeti e plagosur një kalimtare. Në dëshminë e tij shfajësohen 3 shokët që e shoqëronin, pasi pretendon se Metën ka dashur ta takojë ai për të sqaruar një keqkuptim, por situata ka degjeneruar deri në përdorimin e armës.

?Në 5 shkurt 2020, unë së bashku me shokët e mi, Argjend Rexha dhe Riad Gjeladini,të cilët i njoh prej disa kohësh, konkretisht Riadin e njoh në shtetin e Gjermanisë, kurse Argjendin e njoh në Shqipëri, i kam takuar në qytetin e Durrësit dhe gjatë bisedave, u shpreha dëshirën atyre që së bashku të pimë një kafe në qytetin e Shkodrës.

Pas këtyre bisedave, shokët e mi shprehën dëshirën të shkojmë në qytetin e Shkodrës, ku dhe jemi nisur menjëherë. Në drejtim të qytetit të Shkodrës, jemi nisur me një taksi të rastit, të cilën e kemi marrë në qytetin e Durrësit, në rrugën kryesore Tiranë-Durrës, pranë karburantit në dalje të qytetit. Pasi kemi arritur në qytetin e Shkodrës, jemi afruar pranë pedonales së qytetit. Gjatë qëndrimit në këtë pedonale jemi ulur në njërin nga stolat, që ishte aty pranë, duke biseduar me njëri-tjetrin. Dua të theksoj se qëllimi im ka qenë që unë të kontaktoj shtetasin Mirsad Meta, për të sqaruar një keqkuptim në mënyrë verbale, keqkuptim i cili ka ndodhur kohë më parë në formën e mosmarrëveshjeve midis nesh. Për këtë fakt unë nuk i kam vënë në dijeni dy shokët e mi, thjesht u kam thënë se duhet të shkojmë për qejf deri në qytetin e Shkodrës. Gjatë qëndrimit tonë në pedonale, kam arritur të njoh shtetasin Mirsad Meta, i cili po vinte në drejtim të pedonales duke dalë në krah të bankës dhe në drejtimin e një automjeti BMW. Në këto momente unë jam çuar nga stoli ku isha ulur dhe jam nisur në drejtim të tij, ku kam dashur ta ndaloj dhe të sqarohemi…?, thuhet në deklaratën e zbardhur nga Shqiptarja.com.

Ndërkohë policia dyshon se shkaku i konfliktit ka qenë prishja e marrëdhënieve me drogën në Gjermani. Në banesën e efektives ka shpërthyer një sasi tritoli më 26 janar të këtij viti, duke e agravuar edhe më tepër situatën.

Por ndonëse Buraku ka qëlluar me armë drejt Metës, objektivi nuk ka marrë asnjë plumb, por e plagosur mbeti këmbësorja L.Jerevia.

Për këtë ngjarje u arrestua Argjend Rexha, Ension Buraku dhe Rihad Xheladinin, pasi ndaj tyre rëndojnë akuzat për veprat penale ?Vrasja ne? rrethana të tjera cilësuese?, ?Plagosja e lehtë me dashje? dhe ?Armëmbajtja pa leje?./ CNA.al