E fundit!

22:00 Aktualitet

VIDEO/ Ndryshim drastik i motit në Vlorë, stuhia përfshin qytetin bregdetar

Qyteti i Vlorës është përfshirë mbrëmjen e sotme nga një s...

Pse Rama nuk i jep bjondes të lexojë listën e plotë të OFL-së?

6 Shkurt 2020, 09:32, Politikë CNA

Dje Lulzim Berisha i dha përgjigje OFL-së!

Ka dy autobotë, një BMW dhe një lokal me qira!

Këtu historia e tij duhet të konsiderohet e mbyllur. E ç’mund ti kërkosh dikujt që nuk paska as shtëpi në emër të vet?

Pardje çunat me kapuça bënë edhe ca poza në dyert e ca vilave andej nga Shkodra dhe nëpërmjet asaj çupës me syze u kërkuan pronarëve të plotësonin dhe ata ca formularë.

Edhe ata do i plotësojnë! Nuk kanë në plan të dëgjojnë këshillen e avokat Ngjelës, që u tha se ligji është antikushtetuese ndaj as mos e çanin kokën fare e mos ti përgjigjeshin fare OFL-së. Fundja të pretendosh që të argumentosh me dispozita kushtetuese me këtë grupim e tu flasësh mbi rendin kushtetues dhe hierarkinë e akteve duket si naivitet, (nëse keshilla nuk vinte nga avokati i madh Ngjela).

Zelli me të cilin të dalët nga burgjet po vrapojnë të mbushin formularët mund të konsiderohej edhe mallëngjyes nëse nuk do u dukej të gjithëve kaq i dyshimtë. Njerëz që s’kanë lënë gjë pa bërë kundër ligjit dhe s’kanë lënë presje pa përdorur për të dalë nga burgjet për sjellje të mirë, nuk dëgjojnë avokat Ngjelën e po nxitojnë të marrin edhe çertifikatën e pasurisë.

Operacioni që u reklamua si fillimi i fundit të të fortëve edhe pak e do bëhet si komision çertifikimi i pasurive të tyre dhe i mitit të rremë që paskemi patur për këta të fortët me shumë prona.

Tani po “mësojmë” që këta na paskeshin patur njëri vetëm nga dy autobote dhe të tjerë veç nga një vilë.

Super/resortet u harruan, (siç u harruan llogaritë off-shore të gjyqtarëve, e kujtoni besoj)!

Dhe midis të tjerave, askush nuk po sheh ndonjë kriminel në pranga. Ose shohim çupen me syze, ose çunat me kapuç dhe kur kemi fat edhe ndonjë grua që del në ballkon me dy qentë e shtëpise dhe sodit çunat me kapuça.

Një nga këta të fortet bile, sa dëgjoi në TV që po i kërkonin formularin e pasurive, preu bileten dhe erdhi urgjent nga jashtë shtetit.

Dje dolen tre emra të tjerë e sot do dalin me siguri tre të tjerë. Besojme se të gjithë nga TV po dëgjojnë se duhet të plotësojnë formularin e pasurive.

Ajo që nuk po kuptojmë është se pse nxjerrin atë çupen përditë të lexojë veç nga tre emra!?

Pse nuk lexon gjithë listen ajo?

Jo për gjë, po se mund të jenë jashtë shtetit njerëzit! Mbase u duhet kohë sa të presin biletat e kthimit. Dikush mund të jetë edhe burgjeve jashtë shtetit e i duhet të organizohet e të angazhojë njerëz qe t’ja nisin urgjent atë formularin.

Leximi i listës së plotë ka shumë avantazhe për OFL- në. Duke lexuar listen e plotë, mundet që ndonjëri edhe të kërkojë ta shtojnë në listë se mund ta kenë harruar!

Deputetet e grupit parlamentar mund të kenë edhe ata informacionet e veta si njerëz që i njohin mirë zonat elektorale dhe të “fortët” respektivë.

I hyri që i hyri kësaj pune zoti Rama! Ta bëjë tamam!

Ta lexojnë dhe shqiptarët atë listë! Se kanë filluar të kenë dyshime që tani te kjo OFL-ja dhe nuk mban gjatë kurioziteti dhe kërshëria e bjondes së konferencave ditore me nga tre emra.

Ka nga ata që po thonë që Rama po bën kot! Qe e ka show! Ndaj duhet lista! Jo me emra tre nga tre! Po me 333 emra! Se nuk ka as shumë kohë pasi akti mormativ ka afat deri në 31 dhjetor 2020.

Mundet mbeten jashtë liste të fortë të rëndësishëm. Nga ata që kanë marrë edhe tendera. Dhe larg qoftë ju mbeten pasuritë të padeklaruara. Nuk vjen prap një akt normativ si ky.

Sot është dhe fryma shumë e favorshme. Se meqë po vrapojnë të gjithë të deklarojnë, do nxiten nga njëri-tjetri e do i tregojnë të gjitha.

Ndaj duhet lista e plotë.

Të mblidhen sa më shpejt ata formularët. Që çupat e OFL-së pastaj të kenë edhe kohën e mjaftueshme që t?i lexojnë, verifikojnë, çertifikojnë dhe të na lexojnë pastaj edhe konkluzionet.

Për çdo emër!

Emër për emër!

Do kemi durimin pastaj ti dëgjojmë edhe me lista tre e nga tre.

Por në fund të gjithë do duam të dime se si rezultuan tek OFL të gjithë ata që populli i di dhe i njeh mirë.

Për secilin emër ne fund do të duhet që OFL të japë prangat, çertifikatën e pastërtisë ose shtëpi dhuratë.

Rama besojmë mund ta rimendojë nëse e gjitha kjo është show banal.

Ky është një nga ato raste kur show nuk mban dot gjatë. Aq më shumë që perveç ndonjë deputeti që beson se e di listën, pak kush po del të duartrokasë teatrin e çunave me kapuç./ CNA.al