Paralajmëron Tufa/ Do them të vërteta rrëqethëse, ja institucionet e mbushura me “kriminelë”

6 Dhjetor 2019, 19:56, Politikë CNA

Një paralajmërim i fortë ka ardhur sot nga ish-Kreu i Institutit për Krimet dhe Pasojat e Komunizmit, Agron Tufa, i cili është larguar nga Shqipëria dhe ka kërkuar azil politik në Zvicër për shkak të kërcënimeve me vdekje.

Në një intervistë për Zërin e Amerikës, Tufa paralajmëroi se do të tregojë të vërteta rrëqethëse dhe të trota, ndërsa zbuloi se institucione si “SHISH-i dhe Policia e Shtetit janë të mbushura plot për plot me njerëzit me të kaluarën më të zezë”.

?Unë besoj se do të kem mundësi të tjera tani, jo drejtpëdrejt shtetërore por do të jem nga disa pikëpamje shumë më i lirë për të thënë të vërteta rrëqethëse dhe të troçta sesi institucionet e larta që nga ato ligjvënëse dhe deri tek institucionet e ndjeshmërisë së veçantë si SHISH-i apo policia e shtetit janë të mbushura plot për plot me njerëzit me të kaluarën më të zezë, pra ish oficerët dhe shefat e Sigurimit të Shtetit, ish kryetarë dhe nënkryetarë të Degëve të Punëve të Brendshme, ish rezidentë. Pra kjo është e papranueshme, dhe është gjëja më e zezë. Është gunga në shpinën e shoqërisë shqiptare e cila patjetër duhet të përballet me këtë. Në mos, ne duhet të pranojmë një poshtërim kolektiv dhe një cilësi jashtëzakonisht të ulët dhe të keqe të lirisë sonë?, tha shkrimtari.

Teksa u pyet për marrjen e presidencës së radhës së OSBE-së nga Shqipëria, Tufa deklaroi se ky është një paradoks i një rendi absurd.

?Këto lloj paradoksesh të një rendi absurd unë nuk di sesi kanë mundur të ngjasin, por sigurisht kjo gjendje nuk erdhi dhe u bë faktike e tillë, tani. Kjo ka qënë një mospërballim i situatës post-tatalitare të Shqipërisë. Ne nuk u përballëm me detyrat, dhe detyra kryesore ishte eliminimi ose mënjanimi, spastrimi nga hapësirat publike të institucioneve të legjislacionit, të drejtësisë të trashëgimisë komuniste. Ata tashmë kanë mbërritur në një pikë konsolidimi, ndjehen të sigurtë madje përdorin edhe slangun e tyre të parapëlqyer të shantazheve dhe kërcënimeve me vdekje. Unë mendoj se ne nuk u përballëm dot atëhere kur duhej dhe si duhej me këtë trashëgimi, e cila sigurisht të vetmen mënyrë sjelljeje ka pasur atë të përndjekjes, të kërcënimeve, të dënimeve, pushkatimeve, e të genocidit siç i kam studiuar unë këto tetë vite në dokumentat e dosjeve të arkivave të sigurimit të shtetit?, theksoi ai./ CNA.al