web counter
LEXO PA REKLAMA!

SHKARKO APP

App Store
Google Play

E fundit!

x

Shqipëria, dështim në respektimin e të drejtave të fëmijëve

20 Nëntor 2019, 10:10, Sociale CNA

Në 30-Vjetorin e Konventës për të Drejtat e Fëmijës, Shqipëria mbetet ende një vend me shkelje serioze të të drejtave të fëmijëve!

Dita e sotme përfaqëson Ditën Ndërkombëtare për të Drejtat e Fëmijës dhe 30-vjetorin e Konventës për të Drejtat e Fëmijës (KDF).

Shqipëria është një ndër vendet e para që ratifikoi KDF-në, 27 vjet më parë, në Shkurt 1992. Megjithatë vendi vazhdon të mbetet burimi i shkeljeve serioze të të drejtave të fëmijëve, sidomos në drejtim të mungesës së mbrojtjes së mjaftueshme për fëmijët nga dhuna dhe shfrytëzimi seksual, skllavëria dhe përdorimi për punë të rëndë e të detyruar, varfëria në masë e fëmijëve dhe mos-garantimi i të drejtës për arsim.

Nisur nga kjo gjendje e rëndë, të cilën CRCA/ECPAT Shqipëri dhe shumë organizata të tjera të shoqërisë civile e kanë raportuar çdo vit, kemi vendosur që në vend të festës, të marshojmë dhe protestojmë për ndërgjegjësimin e Qeverisë, politikanëve, shoqërisë, fëmijëve dhe medias, mbi situatën në të cilën ndodhen fëmijët dhe adoleshentët në vendin tonë.

Të dhënat e mëposhtme, të shkëputura nga një sërë raportesh, tregojnë situatën e rëndë të fëmijëve në Shqipëri:

86% e fëmijëve në Shqipëri thonë se të drejtat e tyre nuk respektohen;
89 % e fëmijëve të intervistuar deklarojnë se Qeveria nuk ka bërë mjaftueshëm apo aspak për të mbrojtur të drejtat e tyre;
Çdo 3 ditë humbet 1 fëmijë në Shqipëri. Gjatë 3 viteve të fundit, 365 fëmijë kanë humbur, prej të cilëve 258 vajza dhe 107 djem.
Mbi 50,000 fëmijë punojnë në punë të lehta e të rënda për të siguruar mbijetësën e familjeve të tyre;
77% e fëmijëve në Shqipëri kanë përjetuar të paktën një formë të dhunës në familje;
11% e fëmijëve në Shqipëri janë viktima të ngacmimeve dhe abuzimit seksual;
41% e fëmijëve, janë viktima të një forme të dhunës në shkolla.

Marshimi nis para Ministrisë së Shëndetësisë dhe Mbrojtjes Sociale, për të vijuar më pas drejt Bashkisë së Tiranës, duke u ndalur para ndërtesës së Kuvendit të Shqipërisë dhe Kryeministrisë.

Të gjitha organizatat e shoqërisë civile që punojnë e avokojnë çdo ditë për të drejtat e fëmijëve, kanë vendosur të ngrenë zërin e tyre për të kërkuar një perspektivë më të mirë për fëmijët në Shqipëri, për të kërkuar zbatimin e Konventës së të drejtave të fëmijëve, për të kërkuar llogari nga institucionet shqiptare lokale dhe qendrore, për respektim të plotë të të drejtave të fëmijëve dhe adoleshentët. Kuvendi, Qeveria dhe Bashkitë në Shqipëri e kanë për detyrë që, jo vetëm të zbatojnë të plotë ligjin për të drejtat dhe mbrojtjen e fëmijëve, por edhe të marrin të gjitha masat që asnjë fëmijë të mos gjendet i vetëm, pa përkrahje apo i harruar! Ne sot i bëjmë thirrje çdo zyrtari publik dhe politikani: Mbroni fëmijët! Mos lini asnjë fëmijë vetëm në çastet më të vështira apo vendimtare në jetën e tyre!





Lajmet e fundit nga