Të preferuara nga Qeveria/ FMN: Pse PPP-të e pakërkuara janë rrezik për buxhetin

23 Korrik 2019, 18:22, Aktualitet CNA

Partneriteti Publik Privat, i njohur masivisht si PPP, është një praktik tepër e preferuar nga qeveria e rilindjes Rama, por dhe tepër e anatemuar nga opozita sipas të cilës PPP-të janë mjeti me anën e të cilit Kryeministri grabit paratë e taksapaguesve.

Ndërkohë lidhur me PPP-të ka patur një qëndrim vlerësues edhe nga Fondi Monetar Ndërkombëtar (FMN). Rreth praktikës PPP është shprehur dhe shefi i Misionit të FMN-së në Shqipëri, Jan Kees Martijn, nëpërmjet një interviste dhenë radios amerikane VOA.

Pyetjes së VOA-s lidhur me raportin kritik ndaj PPP-ve dhe krijimin e Korporatës Shqiptare të Investimeve, Jan Kees Martijn i është përgjigjur:

“Është e rëndësishme të pranojmë se Shqipëria ka nevojë për infrastrukturë dhe qeveria ka të drejtë të kërkojë mënyra për të rritur shpenzimet për rrugë, porte dhe aeroporte. Është e arsyeshme ta realizojë këtë përmes PPP-ve. Ne kemi theksuar se PPP-të sjellin rreziqe për buxhetin. Pra është shumë e rëndësishme të sigurohemi që kur merren në shqyrtim këto projekte të ketë një analizë të kujdesshme, të vlerës së investimit, të rrezikut që po ndërmerr dhe e monitoron nga afër situatën nëse këto rreziqe materializohen. Kemi vënë re se këto masa nuk janë zbatuar gjithmonë. Autoritetet po punojnë për ta përmirësuar këtë, për të ndryshuar kuadrin ligjor të PPP-ve për t?i dhënë ministrisë së Financave një rol qëndror në monitorimin e projekteve, por edhe për të qënë e përfshirë në përgatitjen e projekteve para se ato të nënshkruhen. Me një rol më të madh të ministrisë së Financave, duhet të jetë e mundur që projektet të hartohen me kujdes dhe me më pak rrezik financiar. Ne kemi theksuar gjithashtu nevojën për të qëndruar larg propozimeve të pakërkuara, pra PPP që nuk janë të propozuara nga vetë qeveria por kur propozimi vjen nga një investitor. Ne e kemi thënë se është shumë e rëndësishme që qeveria të fillojë duke planifikuar përparësitë në të gjithë sektorët. Qeveria të propozojë projektet dhe të gjitha të kalojnë në një proces tenderimi konkurrues. Projektet e pakërkuara nuk përmbushin këto kërkesa konkurrimi. Largimi nga këto praktika do të ishte hapi në drejtimin e duhur”./CNA.al