Prokuroria politike në duart e Lulzim Bashës!

26 Mars 2019, 20:09, Aktualitet CNA

Ka një sulm të vazhdueshëm ndaj Prokurorisë, menjëherë pas fillimit të hetimeve ndaj disa eksponentëve të PD dhe vetë kryetarit të saj Lulzim Basha.

I pari që e ka akuzuar si politike është Ervin Salianji dhe disa eksponentë të tjerë pas skandalit ?Babale?. Në fakt një çështje e hetuar nga prokurorë që shihen më afër opozitës se me socialistët, ose më qartë nga më profesionistët. Sot çështja nga Gjykata e Krimeve të Rënda ka kaluar në Prokurorinë e Tiranës, që drejtohet nga Elisabeta Imeraj, prokurorja e grupit hetimor të Saimir Tahirit, që PD e vlerësonte publikisht dje. Në fakt ajo njihet për lidhjet e saj të forta me PD, tani quhet politike kur hetonte Saimir Tahirin dhe kërkonte arrestimin e tij jo.

Rasti i dytë është i kryetarit të PD, Lulzim Basha, i cili ka dalë hapur në mbrojtje të prokurorëve që hetonin çështjen Tahiri, dhe që tani, kur duhet të hetohet vetë për një skandal 1 milionë dollarë dhe financime nga offshoret ruse për lobing në SHBA, i sulmon dhe akuzon si politikë.

Sërish në krye të Prokurorisë së Tiranës është e njëjta prokurore, pikërisht Elisabeta Imeraj, që Basha dhe shumica e deputetëve të PD i kanë dalë në mbrojtje publike, por që kur e thërret Lulin nga e pavarur bëhet politike.

Janë dhe dy dosje të shumëpërfolura nga PD. Dosja 339 dhe dosja 184. Përtej tymit që është ngritur mbi to, a nuk është Prokuroria që i ka hetuar dhe zbardhur ato që PD i denoncon publikisht? Dhe a nuk janë vetë ata prokurorë që po thellojnë hetimet që ndoshta kanë kërkuar edhe arrestimet që denoncon vetë Luli, pse nuk janë politikë?

Nga ana tjetër, a nuk është e njëjta Prokurori, ajo e krimeve që shkoi deri në arrestime deputetësh të PS, kur opozita e vetme PD, akuzonte ish-kreun e Kuvendit Ilir Meta në një komploit vrasjeje të ngelur në tentativë? Në atë kohë Meta ishte aleat me Ramën, sot aleat i PD. Kur është politike Prokuroria kur heton dosje dhe skandale të socialistëve, që nga hetimi i ish-ministrit të Brendshëm Saimir Tahiri, arrestimi i Tom Doshit dhe Mark Frrokut, hetimi i dosjeve 339 dhe 184? Në këto raste PD ka qindra qëndrime publike pro prokurorëve, ndërsa sot që një video përgjim del e montuar nga një kriç delirant oborri dhe Lulzim Basha është kapur ?i gjallë?, jo nga prokuroria shqiptare por nga FBI dhe mediat amerikane, Prokuroria është politike?

Pse vetëm Luli dhe qesharakët e tij nuk duhet të hetohen, apo merren të pandehur, që një prokurori mos të jetë politike? Apo kur heton socialistët është në rregull dhe kur heton abuzimet dhe krimet e Lulzimit me shokë është politike?

Kjo sjellje politike në publik e Bashës dhe ekipit të tij, për të rrëzuar Prokurorinë dhe mbuluar skandalet e manipulimet e tyre, me akuza politike, po i jep efekt të kundërt PD në opinion publik. Jo për shkak se Prokuroria po keqpërdoret nga socialistët, por për shkak të mbrojtjes që vete Basha dhe PD i kanë bërë Prokurorisë dhe deklaratave të freskëta pro saj. Tahiri është në bangën e të akuzuarve, edhe Salianji, edhe Luli shumë shpejt. Dhe në rast se duhet të bëhet sa më politike le të shtohet Ilir Meta, ministrat e Ramës dhe kushdo që ka bërë zullume dhe është fshehur pas akuzave politike për të shpëtuar lëkurën.

Një Prokurori e tillë politike na duhet, sa më politike dhe sa më afër Lulzim Bashës./CNA.al