E fundit!

18:28 Aktualitet

Të enjten seanca e fundit e sesionit parlamentar/ Në rend dite, një sërë projektligjesh

Seanca e fundit plenare e këtij sesioni parlamentar do të ...

Lefter Maliqit nuk i ka dalë inati me Bashën/ Ja çfarë thotë për pranimin e mandatit të Astrit Veliajt

19 Shkurt 2019, 19:39, Aktualitet CNA

Ditën e djeshme Partia Demokratike ka publikuar vendimin e marrë në mbledhjen e Grupit të saj parlamentar për djegien e mandateve të deputetëve, në vijim të objektivit për të rrëzuar me çdo çmim kryeministrin Edi Rama.

Vendimi i PD-së, për heqjen dorë nga mandatet, presupozon faktin që pas depozitimit të kërkesave pranë KQZ, kjo e fundit të vijoj procedurën ligjore për kalimin e mandateve të djegura kandidatëve të PD-së, që janë pjesë e listës. Një ndër të cilët është edhe Lefter Maliqi, ish kandidati i tretë i listës Basha për Beratin.

Rreshtimi si i tretë dhe jo i pari në listën e kandidatëve, sikurse Lulzim Basha i kishte premtuar atëherë, u komentua nga Maliqi si “mashtrim” duke sjellë dhe acarimin midis tij dhe Bashës, deri në atë pikë sa Lefter Maliqi ti përgjigjej pozitivish ftesës së Edi Ramës për tu bërë pjesë e Rilindjes.

Me popullaritetin që gëzonte në zonën e Lapardhasë, Maliqi i dha PS-së mbi 5000 vota, kurse Rama ia shpërbleu duke e emëruar në detyrën e zv, Drejtorit të Përgjithshëm të burgjeve, ku shërben edhe sot.

I pyetur nga CNA.al lidhur me pranimin apo jo të mandatit, pasi rivali i tij, Astrit Veliaj, ta dorëzoj atë, Lefter Maliqi, u shpreh se deri tani nuk ka njoftim për një gjë të tillë, duke e lenë të hapur hedhjen e hapit në kohën e duhur. Por inati me Lulzim Bashën nuk i ka ikur ende. Dhe ja pse:

” Lulzim Basha më premtoi për të qenë kandidat në garën për kryetar bashkie në Berat në 2015 dhe më gënjeu, pasi në vendin tim vuri një nga Partia Republikane. Më hëngri në besë në 2017, kur, më premtoi se do më vinte të parin, por jo vetëm më vuri të tretin në listën e kandidatëve për deputet, pas Astrit Veliur, por më ndaloi të garoja edhe për kryetar të Degës së PD-së së Beratit. Por edhe ky nuk ishte “mëkati” i fundit i Lulzim Bashës ndaj meje. Më mohoi dhe konkurimin për Drejtor i Departamentit të Rendit të PD-së, duke më fshirë emrin nga lista…. Kalova me Edi Ramën pasi Z. Basha në debatin që patëm më mbylli çdo shteg dialogu.. Lidhur me pyetjen që më bëtë për pranimin e mandatit të deputetit po ju përgjigjem se vendimin do ta marr në kohën e duhur. Jam duke i ndjekur situatat në mënyrë që të marr një vendim vetëm në interes të banorëve,? -është shprehur zv. Drejtori i Përgjithshëm i burgjeve Lefter Maliqi për CNA.al.

Kujtojmë se nëse Maliqi pranon ofertën e pranimit të mandatit të djegur nga Astrit Veliaj kjo mund të hapë precedentin e zëvendësimit të mandatdjegurve nga kandidatët e listës, duke e hedhur në erë strategjinë e Lulzim Bashës dhe Monika Kryemadhit për ta rrëzuar Ramën./CNA.al