E fundit!

16:47 Aktualitet

Mosfillimi i hetimeve për punonjësit e paraburgimit/ Gjykata e Tiranës rrëzon Metën

Gjykata e Tiranës ka vendosur të rrëzojë kërkesën e paraqi...

SHËNIM/ A përmirësohet qeverisja nga ndryshimet në kabinetin Rama

26 Dhjetor 2018, 19:01, Aktualitet CNA

Prej muajsh ka një kakofoni lidhur me domosdoshmërinë e ndryshimeve që duhet të ndërmarrë kryeministri Edi Rama në kabinetin e tij.

Shkrimet me këtë temë kanë qenë dhe vijojnë të jenë prezente së bashku me argumentat që sillen, ku e përbashkëta rrotullohet rreth faktit se, përjashtuar disa arritjeve, dy qeveritë e Rilindjes nuk ia kanë dalë ta përmirësojnë varfërimin e shqiptarëve. Një e vërtetë kjo që nuk e tjetërsojnë as statistikat e ministrit Ahmetaj dhe as postimet e vetë kryeministrit Rama, i cili i nis ditët e kiametit të pjesës dërmuese të shqiptarëve duke postuar në rrjetet sociale pjesë fragmentare të sukseseve, të cilat ia atribuon qeverisë që drejton prej më shumë se pesë vitesh.

Intensiteti i shkrimeve më këtë temë u shpeshtua veçanërisht në ditët para mbajtjes së kryesisë së socialistëve, ku thirrjet dhe shpresa për shpalljen e ndryshimeve në kabinet ishte mbizotëruese. Mirëpo vrulli mediatik u zbyth pasi në asnjë nga frazat e artikuluara në konferencën e shtypit, pas përfundimit të mbledhjes së Kryesisë, Edi Rama nuk e përmendi, madje as nuk e la të nënkuptuar se do të ketë rifreskim të kabinetit. Gjithsesi kësaj, për të marrë veten me të mirë, ata që i kishin paralajmëruar ndryshimet vijojnë të publikojnë se ato janë shtyrë për në muajin Janar 2019, që është edhe viti elektoral. Ndërkohë që ca të pakët këmbengulin se ndryshime nuk do të ketë dhe Rama do ti shtyjë këto vite të mbetura me këtë ekip?

Në këtë kakofoni pyetja që mbetet pa përgjigje është: Edhe nëse ndryshimet në kabinet bëhen, a e ndihmon kjo qeverisjen që të bëhet më e mirë? Në kuptimin që me politikat e veta kabineti i ripërtërirë Rama të sjellë më shumë begati për taksapaguesit më të varfër të Europës, madje edhe të rajonuit.

Fakti që nga pasvitit 2013, kur morri votbesimin për të qeverisur vendin, deri më sot, dy kabinetet Rama ja kanë dalë që me politikat e aplikuara të pasurojnë më shumë shtresat e grabitësve të fondeve publike, nëpërmjet PPP-ve, tenderimeve pa konkurim etj., marifeteve për të cilat kryeqeverisësi është profesionit, ndërkohë që ka shpënë në zgrip të varfërisë shtresën e mesme e më poshtë, tregon se arsyeja e keqqeverisjes nuk është vetëm ndryshim ministrash. As çështje paaftësie individuale.

Ka ndodhur ky varfërim ekstrem pasi në themel të strategjive të të dy qeverive Rama, nuk ka qenë përmbushja e premtimeve elektorale për hapje vëndesh të reja pune, shtim të ardhurave, luftë ndaj korrupsionit etj., por riciklimi në pushtet për të shtuar pasuritë oligarkët shërbestarë të pushtetit. Dhe duke qenë ky objektivi qendror si të ndryshojë ministra Rama, si të mos i ndryshojë kjo nuk ka asnjë rendësi, pasi nuk sjell asnjë dobi për pjesën dërmuese të taksapaguesve portofolhollë, të cilët janë të dënuar ti shtyjnë ditët deri sa vetë Ramës ti mbushet mëndja të qeverisë edhe për pasurimin e tyre./ CNA.al