SHÇBA procedon të plagosurin dhe efektivin e policisë

2 Tetor 2018, 13:31, Aktualitet CNA

SHÇBA ka proceduar të riun, Sidion Tabaku që refuzoi ti bindej policisë, pasi drejtonte motorin pa patentë dhe kaskë mbrojtjen, si dhe efektivin e policisë që e plagosi.

Në njoftimin për media shpërndarë nga Ministria e Brendshme thuhet se punonjësi I policisë, ka pasur dyshime se Tabaku ka pasur në dorë një armë dhe në këtë moment, ka nxjerrë armën e shërbimit për ta mbushur, por në këto kushte arma ka realizuar qitje të pavullnetshme.

Pas këtij momenti oficerët e kanë marrë Tabakun dhe kanë shoqëruar në ambientet e urgjencës.

Njoftimi i plotë i Ministrisë së Brendshme:

Në njoftimin e shpërndarë nga ministria e Brendshme thuhet se i riu u ndoq nga pas prej policit, pasi ishte rrëzuar nga motori. Në ndjekje e sipër arma e tij ka kryer qitje të pavullnetshme

Në datë 1 tetor 2018, rreth orës 23:00 shtetasit S.T., duke lëvizur me një çiklomotor pa kaskë mbrojtëse, në ?Rrugën e Dibrës?, iu bë shenjë nga një patrullë e Policisë për të ndaluar.

Ai nuk ka ndaluar, por ka shtuar shpejtësinë dhe është futur në një rrugicë përballë spitalit ?Nënë Tereza?. Për disa minuta ndjekje, nuk i është përgjigjur urdhrave të Patrullës së Policisë.

Gjatë lëvizjes nëpër rrugica, i riu është rrëzuar nga motorri dhe ka vijuar lëvizjen me vrap.

Punonjësi i Policisë më afër tij, në ndjekje e sipër ka dyshuar se shtetasi S.T. ka patur në dorë një send të dyshimtë si armë zjarri.

Kështu efektivi ka nxjerrë armën e shërbimit për ta mbushur, për çdo eventualitet a rrezik, pasi ndjekja po vijonte në gjysëm errësirë në rrugica.

Në këto kushte arma e punonjësit të Policisë ka realizuar qitje të pavullnetshme.

Pas kësaj, punonjësit e Policisë kanë vijuar ndjekjen për rreth 100 metra dhe arritën ta kapin 28-vjeçarin.

Patrulla kur e konstatoi gjendjen e tij, i ka dhënë ndihmën e parë dhe e shoqëroi S.T. për ndihmë në spital me ambulancë, pasi kishte dëmtime në fytyrë, shkaktuar nga rrëzimi me motorr dhe në pjesën e pulpës së këmbës.

Në fund të veprimeve hetimore, shtetasi S.T. është proceduar në gjendje të lirë për ?Mosbidje ndaj urdhrave të punonjësit të rendit publik? dhe ?Drejtim të mjetit në mënyrë të parregullt?.

Hetimi është kryer nga strukturat e SHÇBA Tiranë, të cilat kanë proceduar punonjësin e Policisë B.B., për ?Plagosje nga pakujdesia?.

Njoftimi i Ministrisë së Brendshme /CNA.al