LEXO PA REKLAMA!

SHKARKO APP

Ministria e Arsimit si call-center

3 Maj 2018, 14:54, Aktualitet CNA
Ministria e Arsimit si call-center

Në adresë të redaksisë së CNA.al, ka mbërritur një denoncim lidhur me një kërkesë të Ministrisë së Arsimit, e cila u kërkon shkollave emrin e njërit prej prindërve, numrin e tij personal të kartës së identitetit, numrin e celularit dhe adresën e e-mailit.

Sipas denoncuesit në fjalë,nuk dihen ende arsyet se përse po kërkohen këto të dhëna personale, ndërsa ka prej atyre shkollave, të cilat kërkojnë fotokopjen e kartës së identitetit të të dy prindërve.

Në fakt kjo kërkesë bie në kundërshti të plotë me ligjet e vendit.

Ja çfarë thotë “Ligji për mbrojtjen e të dhënave personale”:

“LIGJ

Nr.9887, datë 10.3.2008

PËR MBROJTJEN E TË DHËNAVE PERSONALE

Neni 1

Ky ligj ka për objekt përcaktimin e rregullave për mbrojtjen dhe përpunimin e ligjshëm të të dhënave personale.

Neni 2

Përpunimi i ligjshëm i të dhënave personale bëhet duke respektuar dhe garantuar të drejtat dhe liritë themelore të njeriut dhe, në veçanti, të drejtën e ruajtjes së jetës private.

Neni 3

1. ?Të dhëna personale? është çdo informacion për një person fizik, i cili është i identifikuar ose i identifikueshëm. Elementet, me të cilat realizohet identifikimi i një personi, drejtpërdrejt apo tërthorazi, janë numrat e identitetit ose faktorë të tjerë të veçantë fizikë, psikologjikë, ekonomikë, socialë, kulturorë etj.

Neni 6

Kriteret ligjore për përpunimin
1. Të dhënat personale përpunohen vetëm:

a) nëse subjekti i të dhënave personale ka dhënë pëlqimin;

b) për hartimin dhe përmbushjen e kontratave, në të cilat subjekti i të dhënave personale është palë;

c) për të mbrojtur interesat jetikë të subjektit të të dhënave;

ç) për përmbushjen e një detyrimi ligjor të kontrolluesit;

d) për kryerjen e një detyre ligjore me interes publik ose ushtrimin e një kompetence të kontrolluesit ose të një pale të tretë, së cilës i janë përhapur të dhënat;

dh) për ndjekjen e interesave legjitimë të kontrolluesit ose të një pale të tretë, së cilës i janë përhapur të dhënat, përveç kur këta interesa mbizotërojnë mbi interesat për mbrojtjen e të drejtave dhe të lirive themelore të subjektit të të dhënave.

2. Përpunimi i të dhënave personale, të përcaktuara në kuadër të veprimtarive të parandalimit dhe ndjekjes penale, për kryerjen e një vepre penale kundër rendit publik dhe të veprave të tjera në fushën e të drejtës penale, si dhe në fushën e mbrojtjes dhe sigurisë kombëtare, kryhet nga autoritetet zyrtare të përcaktuara në ligj.

Neni 7

2. Përpunimi i të dhënave sensitive bëhet vetëm nëse:

a) subjekti i të dhënave ka dhënë pëlqimin, që mund të revokohet në çdo çast dhe e bën të paligjshëm përpunimin e mëtejshëm të të dhënave;

b) është në interesin jetik të subjektit të të dhënave ose të një personi tjetër dhe subjekti i të dhënave është fizikisht ose mendërisht i paaftë për të dhënë pëlqimin e vet;”

Por pavarësisht çfarë thotë ligji, ministrja Lindita Nikolla, për interes të OJF-ve të saj, po kërkon diçka të kundraligjshme.

Në denoncimin në fjalë thuhet se prindërit: “Duhet të japin të dhëna të plota mbajtësve të të dhënave: për qëllimin e përdorimit, autorizimin e përpunuesit, të dhënat për përpunuesin dhe të kërkojnë autorizim të qartë.”

Ministrja Nikolla po bën rolin e një call-centeri, për mbledhjen e të dhënave personale të qytetarëve, në kundërshtim me ligjin.

Prindërit nuk janë thirrur në mbledhje, e as nuk janë shpjeguar se për çfarë do të përdoren të dhënat e tyre personale, dhe kush do t’i përdorë ato, por po mblidhen në bazë të një urdhëri me sms, si të ishte një vendim gjyqi partizan. /CNA.al

Lajmet e fundit nga