Statuti i kooperativës dhe statuti i Lulit

18 Prill 2018, 08:27, Aktualitet CNA

Lulzim Basha pritet që pas pak ditësh të mbledhë Këshillin Kombëtar të Partisë Demokratike. Këshilli i Zgjedhur katër vite më parë, i cili nuk është thirrur asnjë ditë që nga data kur është zgjedhur. Katër vite megjithëse me kompetencat si institucioni më i lartë midis dy kuvendeve, këtë e ka të shkruar edhe në statut, Lulzim Basha nuk e thirri kurrë.

Të shtunën e shkuar, Basha mblodhi kryesinë dhe do ti paraqesë Këshillit Kombëtar disa ndryshime statutore, të cilat i përgatiti me sekretarët e tij. Por, këto ndryshime janë një hiç, përpara faktit sesi sillet Lulzim Basha me statutin.

Në gati pesë vite të drejtimit të PD-së prej tij, Basha e ktheu Kushtetutën e demokratëve në letër higjenike, duke e vendosur në tualetin e zyrës së tij.

Pasi u zgjodh vetë kryetar, Kuvendin e zgjodhi një vit me vonesë. Më pas në shkelje të statutit emëroi në krye të sekretariateve dhe departamenteve njerëz pa garë, pra pa i zgjedhur në Këshillin Kombëtar. Emëroi dhe shkarkoi kryetar degësh pa thirrur kryesinë dhe pa bërë asnjë konsultim. Çdo veprim politik e kreu në shkelje të statutit pa thirrur kryesinë. Këshillin Kombëtar nuk e mblodhi asnjëherë në katër vite. Bojkotoi parlamentin pa vendim kryesie. Doli kundër reformës në drejtësi pa vendim kryesie dhe pa mbledhur Kuvendin. Hyri në çadër pa asnjë konsultim me kryesinë e PD-së. Shkoi e firmosi marrëveshje me Edi Ramën, një akt i rëndësishëm politik, pa thirrur Këshillin Kombëtar apo Kuvendin. Hyri në qeveri dhe humbi turpshëm zgjedhjet.

Zhvilloi zgjedhje në PD, të cilat i manipuloi sërish duke shkelur statutin. Ju kërkua në katër vite pa ndalim mbledhja e Këshillit Kombëtar dhe asnjëherë nuk e bëri. Thirri kryesinë në shtator duke premtuar analizë. Nuk e bëri kurrë dhe Këshilli Kombëtar apo Kuvendi nuk kanë marrë asnjëherë në shqyrtim dy humbjet e turpshme të Lulzim Bashës.

Gjithçka e ka bërë Basha, këto që përmendem më lart e shumë të tjera janë akte politike që tregojnë se për të statuti nuk vlen, prandaj dhe ndryshimet që po bën janë të pa vlera, kur ai nuk i zbaton.

Rasti i fundit i emërimit të kryetarit të PD-së në Durrës e bën edhe më qesharak statutin e Bashës dhe veprimet e tij.

Dikur kooperativat e famshme të diktaturës, ashtu si Lulzim Basha kanë patur një statut dhe kryetari i kooperativës zgjidhej nga kooperativistët, por që në fakt nuk ndodhte kurrë ashtu. Atë e propozonte komiteti i partisë, ose sekretari i parë i rrethit. Edhe statuti i Lulit, ndryshimet e fundit dhe akti i tij në vazhdim nuk tregojnë gjë tjetër veçse faktin se statuti i PD-së me Lulin në krye është njësoj si statuti i kooperativës në diktaturë./ CNA.al