Skena të nxehta në filmin shqiptar? Nevina Shtylla: Ishin të sikletshme dhe nuk...

30 Janar 2018, 11:10, Aktualitet CNA

Ajo ishte vetëm 16 vjeç kur u shpall “Miss Shqipëria”, megjithatë shumë pak e mbajnë mend nga ai kompeticion. Nevina Shtylla njihet më mirë si moderatorja e emisionit “Jo vetëm modë” pas ikjes së Floriana Garos.

Por prezantuesja e njohur ka provuar gjithashtu veten në aktrim duke luajtur në filmin ” Ti mund të më quash Xhon?.

Ajo pranoi propozimin e Papadhimitri Production për të luajtur rolin e Lornës, megjithatë refuzoi disa skena “të nxehta” që ishin parashikuar në film.

Nevina arriti të binte në kompromis me regjisorët, duke iu pohuar se nuk ishte gati për disa gjëra. Bukuroshja brune i ka bindur të gjithë me pamjen e saj dhe për këtë arsye nuk është ngulur shumë këmbë lidhur me rolin e saj.

Në një intervistë për “Panorama”, ish-Miss Shqipëria ka treguar se ekrani nuk ka qenë ëndërr e saj në fëmijëri, por ama ishte një dashuri e papritur nga e cila nuk mund të ndahet.Ajo ka thënë:

Moderimi mbetet ajo pjesë e jetës time që i kushtoj më shumë vëmendje e mundohem çdo ditë të përmirësohem. Sidoqoftë, kjo nuk do të thotë se të tjerat nuk janë të rëndësishme. Filmi është një fushë ende e re për mua, që më ka shtyrë të eksperimentoj edhe në pozicionin e asistente regjisores, në bashkëpunim po me Papadhimitri Production që menaxhon edhe studion e kastin AlbaniaCasting. Ndërsa modelimi është diçka që nuk më përket dhe nuk më karakterizon.

Përsa i përket rolit në filmin ?Mund të më quash Xhon?, moderatorja tregon se e ka ndihmuar të plotësohet profesionalisht dhe bashkëpunimi me regjisorët vazhdon ende. Gjithashtu ajo ka sqaruar problemin me skenat e puthjeve.Ajo është shprehur:

Puthjet ishin pjesë e skenarit që në fillim, të gjithë ata që vinin në kinoprovë ishin shumë të qartë për këtë, kështu që nuk kishte vend për surpriza në këtë pjesë. Puthjet me një njeri të panjohur, për më tepër kur as nuk i takon aktrimit, pra, nuk ke as trajnimin e duhur qoftë edhe psikologjik, janë të sikletshme dhe kjo është më se e kuptueshme. Por nuk ishin diçka e jashtëzakonshme, gjithsesi. Skenat që janë shkurtuar kanë qenë disa që dukeshin më provokuese dhe që për mua, në këtë dalje të parë, plus edhe profili që ruaj, nuk ishin të përshtatshme dhe për këtë kisha mirëkuptimin e plotë të regjisorëve.

Kam realizuar çdo gjë që shkruhej në skenar, përveç atyre skenave të pakta, për arsyet e sikletit që përmenda më sipër. Në projekte të tilla të dy palët shtrojnë kushtet dhe kërkesat e veta, dëshira për të punuar së bashku ishte më e madhe dhe më vjen mirë që mundëm të merreshim vesh. Por të mos harrojmë, se ka aktorë që janë profesionistë në Shqipëri, por edhe kudo tjetër në botë, që zgjedhin të mos i pranojnë skena të njëjta. Prandaj, mendoj se ky nuk do të ishte faktor i madh ndikues edhe në rastin tim.”

Bukuroshja ka veçuar si aktorë bashkëpunues Gëzim Rudin dhe Gent Kamën për sigurinë dhe besimin që i kanë dhënë. Ajo tregoi se do të jetë patjetër pjesë e ndonjë filmi tjetër shqiptar./CNA