E fundit!

18:15 Politikë

“Prej vitesh me charter për transport parash”/ Nënkryetari i PD-së: Rama e ndan Shqipërinë si plaçkë private

Nënkryetari i Partisë Demokratike, Belind Këlliçi, u ndal ...

Mashtruan me pronat dhe bizneset/ Mbi 30 gjyqtarë dhe prokurorë rrezikojnë të largohen

28 Janar 2018, 11:43, Aktualitet CNA

Vetingu në drejtësi pritet të nisë me largimin e rreth 30 gjyqtarëve dhe prokurorëve.

Momentalisht Komisioni i Pavarur i Kualifikimit po verifikon 57 emra, të cilët janë kryesisht kandidatë për KLGJ e KLP, por dhe anëtarë të Prokurorisë së Përgjithshme apo të Gjykatës së Lartë dhe Gjykatës Kushtetuese.

Gazeta ka mësuar informacione sa i takon dosjeve që kanë dërguar 4 institucione pranë Komisionit të Kualifikimit. Sipas ligjit, Inspektorati i Lartë i Deklarimit dhe Pastrimit të Parave, dërgon pranë komisionit të dhënat mbi verifikimin e pasurisë. Të njëjtën gjë bëjnë dhe DSIK, me pastërtinë e figurës dhe KLD dhe Prokuroria e Përgjithshme me verifikimin e karrierës. Por interesant është fakti se gjëja që pritet të penalizojë gjyqtarët dhe prokurorët është pasuria.

Nga burime të gazetës pranë ILDKP, mësohet se në raportin që ka shkuar pranë komisionit, ka pasur rekomandime negative për gati gjysmën e emrave prioritarë. Problemi kryesor është mosjustifikimi i pasurisë. ILDKP ka bërë një bilanc të të ardhurave për çdo emër, që kur ka filluar karrierën e deri më sot, përfshirë dhe të ardhurat e familjarëve të tyre.

Ato janë krahasuar me vlerën e pasurive që ata zotërojnë dhe ka shumë emra që me të ardhurat nuk e justifikojnë dot pasurinë. Por shkelje janë gjetur dhe sa i takon pronësisë së bizneseve, banesave dhe pronave të paluajtshme. Gjyqtarët dhe prokurorët kanë përdorur hipotekat dhe noterët për të mashtruar me vlerat e objekteve dhe me pronësitë e tyre.

Ka pasur shumë raste kur objektet janë deklaruar me vlera shumë më të ulëta, ose nuk figurojnë më në pronësi të tyre edhe pse janë deklaruar vite më parë. Për këtë arsye, përveç verifikimeve që ka bërë ILDKP, Komisioni i Pavarur i Kualifikimit ka kërkuar të dhëna nga ZVRPP mbi pasuritë e gjyqtarëve dhe prokurorëve dhe si ka ndryshuar pronësia e tyre. Por duket se vetëm sa i takon problemeve me pasurinë gjysma e emrave prioritarë që po verifikohen pritet të përjashtohen nga drejtësia.

Verifikimet e figurës dhe karrierës

Me rëndësi është dhe kontrolli i pastërtisë së figurës dhe korrektësia e gjyqtarëve dhe prokurorëve në vendimet që kanë marrë. Burime të gazetës pranë KPK deklaruan se sa i takon të dhënave që ka dorëzuar DSIK, përgjithësisht gjyqtarët dhe prokurorët kanë rezultuar të pastër.

Detyra e këtij institucioni ishte të verifikonte nëse njerëzit e drejtësisë kanë pasur lidhje me krimin, por përgjithësisht raportet kanë qenë të pastër, pasi nuk ka prova konkrete për takime apo lidhje të gjyqtarëve apo prokurorëve me njerëz të bandave.

Ndërsa sa i takon karrierës, mësohet se KLDP dhe Prokuroria e Përgjithshme kanë ecur me të njëjtin ritëm. Mësohet se këto institucione nuk kanë bërë verifikime, por vetëm sa i kanë dorëzuar komisionit të dhënat e kërkuara.

Mësohet se janë dorëzuar nga 5 vendime për secilin emër, të shoqëruara me procesverbalet e mbledhjeve gjyqësore, regjistrimet audio e video, si dhe janë dhënë informacione mbi procedimet disiplinore për gjyqtarët në fjalë dhe ankesat që ka pasur ndaj tyre./Sot