Braktisin hetimin e dosjeve të mëdha/ Kaos në Prokurorinë e Përgjithëshme dhe atë të Tiranës

17 Shtator 2017, 08:48, Aktualitet CNA

Shumica e prokurorëve, veçanërisht të Prokurorisë së Përgjithshme dhe asaj të Tiranës, kanë filluar të braktisin hetimet për dosjet që lidhen me ngjarje të rëndësishme kriminale, raporton sot gazeta ?Sot?, që në vijimësi shprehet:

Gazeta u interesua pranë këtyre organeve për të marrë informacion mbi hetimet për një sërë zyrtarësh të rëndësishëm, të cilët janë kallëzuar, por deri më tani nuk ka asnjë lëvizje. Po ashtu edhe për një sërë ngjarjesh kriminale të kohëve të fundit nuk ka pasur asnjë zhvillim. Mësohet se prokurorët kanë braktisur hetimet pasi presin që shumë shpejt të largohen.

Sipas burimeve të sigurta nga Prokuroria e Përgjithshme, asnjë dosje e rëndësishme nuk po hetohet, nga ato të korrupsionit, tek dosjet e emrave të rëndësishëm të krimit. Të gjitha janë braktisur, pasi prokurorët kanë nisur të neglizhojnë punën, duke e ditur se me reformën gjithçka do ndryshojë.

Të vetmet çështje që po shqyrtohen janë krimet e rëndomta që ndodhin çdo ditë, ndërsa për çështje të rëndësishme nuk ka asnjë zhvillim. Arsyeja e kësaj neglizhence është se të gjithë kanë nisur të tremben. Por nga ana tjetër, shkak është dhe vonesa me KLGJ e KLP, e cila ka bërë që vetë prokurorët të mos jenë të ndërgjegjshëm për kompetencat që kanë.

Pra i gjithë sistemi po futet në një qorrsokak dhe nëse nuk nxitohet me reformën, mund të paralizohen të gjitha hetimet. ILDKP, DSIK, Hipoteka dhe Drejtoria e Pastrimit të Parave po ushtrojnë kontrolle shumë të rrepta dhe të gjithë prokurorët po merren pikërisht me këtë proces, duke ndjekur verifikimin e tyre dhe kanë lënë pas dore hetimet. Në shumë raste, ata thirren për plotësime dokumentesh dhe sqarime, duke bërë që të gjithë të tremben nga vetingu. Nga ana tjetër, mësohet se shumë persona kanë nisur të mendojnë dorëheqjen.