E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Gjermani foli si gjerman/Lulzim Basha, vendi dhe kuvendi?!

17 Prill 2017, 16:24, Aktualitet CNA

Elvi FUNDO

– Ka reagime dhe qëndrime për gjithçka artikuloi ministri i Jashtëm Gjerman, Sigmar Gabriel, i cili i kërkoi opozitës të kthehej në Parlament dhe të braktiste rrugën e nisur prej saj.

Por Ministri gjerman të gjitha sulmet i bëri në hapat e para të vizitës së tij në Tiranë, duke e vënë Lulzim Bashën përballë faktit të kryer. Ai nuk priti të dëgjonte palët dhe më pas të mbante qëndrim. Ai ishte i drejpërdrejtë, duke folur qartë: PD dhe opozita për Gjermaninë ishte në rrugën e ?gabuar?.

Në fakt, qëndrimi i tij është i rëndësishëm dhe PD nuk mund ta mohojë dhe as ta sulmojë siç po bëjnë disa militantë sharlatanë, apo injorantë politikë. Qëndrimi i Gabriel është qëndrimi zyrtar i qeverisë gjermane, i cili vjen në një moment mjaft delikat. Turqia është në autoritarizëm dhe po i quan gjermanët nazistë. Të njëjtën frymë urrejtjeje, ndaj gjermanëve, ke në Greqinë e mbytur në borxhe, që po i rikthehet një krize të thellë. Ngjitur kemi një republikë të quajtur Maqedoni, apo FYROM, që po mer flakë, terrorizmi kërcënon Kosovën e kështu me rradhë.

Shqipëri prej dy muajsh e ka opozitën në rrugë dhe jo pa kosto për vendin, por edhe për vetë BE-në e Gjermaninë, sepse një tjetër vend mund të destabilizohet nga bllokimi i zgjedhjeve prej opozitës, e cila po proteston paqësisht, duke ?kërcënuar? se gjithë skenarët do jenë ditën e zgjedhjeve.

Gjermani flet si gjerman, pa një dhe pa dy, por kuvendi bëhet sipas vendit.

Basha doli e tha se kishte punën e tij. Askush nuk mund të thotë se Ministri i Jashtëm i Gjermanisë nuk njeh situatën. E njeh mjaft mirë. Mjaft të kujtojmë se Edi Rama largoi Ilir Beqajn dhe Saimir Tahirin menjëherë pas një vizitë në Gjermani e largimet e tyre i pasoi edhe me dy ministra të tjerë. Pra një sinjal kryeministri Rama e ka pasur, por këtë sinjal opozita nuk e lexoi siç i interesonte gjeostrategjisë politike të Gjermanisë si vend udhëheqës i BE, por e lexoi si presion që Rama e hëngri menjëherë. Ndoshta ato lëvizje ishin zgjidhja që Gjermania i ofroi Ramës për mbështetje të mëtejshme.

Shqipëria ka krim, drogë dhe një mijë e një probleme, por një Ministër i Jashtëm gjerman nuk mund të flasë gabim sepse nuk i pëlqen opozitës, apo atyre që po e sulmojnë turpësisht. Opozita mund të vazhdojë rrugën e saj, pra të bëjë atë që bëri Lulzim Basha, i cili shtruar dhe gjatë paraqiti faktet e tij. Ky ishte një shans, ministri e dëgjoi, por kjo ishte hera e fundit. Vështirë se ka një herë të dytë me Gjermanin.

Gjermani foli si gjerman, tani opozita duhet të zgjedhë do vazhdojë rrugën e saj paqësore të protestës duke pritur që Gjermani të ndryshojë mendje apo do zbartojë ?këshillat? e forta të Sigmar Gabriel. Vazhdimi i rrugës mund të sjellë që Basha të mos hyjë më në kancelaritë perëndimore dhe mund të izolohet, po radikalizoi qëndrimet dhe vazhdoi në të njëtën rrugë. Ose mund të fitojë me qëndresë paqësore popullore, ndonëse kjo e fundit mungon, dhe më shumë sesa një frymë popullore ndaj opozitës ka një ankth që lidhet me zgjedhjet e stabilitetin e vendit.

PD dhe Basha kanë të drejtë në qëndrimet e tyre, pasi ende s?ka asnjë garanci serioze për zgjedhjet, por ndërkombëtarët shohin dhe lexojnë ndryshe, largimet e ministrave dhe reagimet e policisë javët e fundit janë një shënjë pozitive për ta. Mund të kërkojnë dhe të tjera lëshime për Bashën, por pa bojkot e pjesëmarrës në Parlament dhe zgjedhje.

PD nuk i njeh këto hapa sepse e di mjaft mirë që këto nuk mjaftojnë për të zgjidhur problemin. Vizita e komshiut në shtepi për një drekë nuk mund t?i tregojë të zotit të shtëpisë ku pikon çatia. Problemi i Shqipërisë është se ska çati fare por ca tulla amerikane e tjegulla gjermane, që po ja hoqen edhe ato ja zënë shtëpinë komshinjtë, ashtu si ish-pronarëve ndërtimet pa leje.

Kreu demokrat Lulzim Basha duket të jetë në një ngërç mjaft të madh për të gjetur një zgjidhje përfundimtare me garanci të plota, por vështirë se zgjidhja është këmbngulja: ja qeveri teknike ja rrashë e vdiqa. Ndoshta do na duhet të presim edhe pak më shumë për të kuptuar nëse Basha do zgjedhë radikalizimin apo do tërhiqet me premtimin për tu mbështetur si kryeministër vite më pas. Thënë këtë të fundit PD nuk fiton dot as me qeveri teknike me Gjermanin kundër, prandaj Basha nuk mund të humbë karrierën për tu zhytur më tej në një aventurë që vështirë se do kishte fund të lumtur për të. Prandaj politika europiane njeh tërheqjen dhe konsensusin. Rama këtë bëri pas darkës tek Krokodili. Ndoshta Basha nuk pranon të bëjë të njëjtën gjë, megjithse këto katër vite ka qenë, thuajse në hapat e opozitës së Ramës.

Lulzim Basha mund të mos tërhiqet dhe të zgjedhë të qëndrojë fort, pasi edhe kjo është një rrugë që e forcon më tej si lider, mund ta bëjë edhe më të fortë, por edhe mund ta dobësojë më shumë, jo vetëm në Shqipëri por edhe tek ndërkombëtarët. Tani është koha që Lulzim Basha të veprojë si shqiptar apo si gjerman, s?ka rëndësi, pasi pasojat i ka vetë ai./Shkruar për Citynews.al