Pse “ushtrimi elektoral” i Bashës po ecën me sukses

24 Shkurt 2017, 11:48, Aktualitet CNA

Nesër demokratët, pra të shtunën, bëjnë një javë në protestën përpara Kryeministrisë.

Kanë braktisur Parlamentin, kanë vendosur kushte, janë izoluar në çadër dhe çdo ditë prej andej i çojnë mesazhe dyshes së qeverisë së vendit. PD ka hyrë mes Ramë e Metës, ka ngritur ?selinë e saj? mes Kryesisë së Kuvendit dhe Kryeministrisë.

Fillimisht opozita provokoi kreun e Kuvendit, duke i kërkuar t?i bashkohej zgjedhjeve të lira, për shkak se këtë kauzë Meta e kish pasur në vitin 2008 dhe tani kish ardhur koha për një marrëveshje dhe kod të ri elektoral. Ilir Meta nuk rriskoi, por shkoi dhe u ngroh në ?prehrin? e Edi Ramës. Basha ka ngelur i vetëm me disa aleatë tradicionalë, por me një fitore spektakolare, deri diku edhe personale të tij.

Basha mundi që të bllokonte për rreth një javë të gjitha mediat, theu çdo censurë dhe ishte lajmi i parë, është të paktën 4-6 orë live në televizione, përçon çdo ditë qëndresë dhe duket i sigurt se rruga që ka nisur nuk ka kthim pas.

Edhe kritikët e tij më të zjarrtë, ata me zë apo ata në heshtje, i janë bashkuar protestës dhe qëndresës. Pranojnë faktin se në Shqipëri zgjedhjet e lira janë në dyshim dhe rruga e nisur nga demokratët nuk mund të ngelet në mes. Qëndresë që mund të ketë disa skenarë, por në përfundim pozitivë ose jo, ka vetëm një fakt, në këtë javë Lulzim Basha është kthyer nga kryetari i heshtur dhe i mefshtë i opozitës, në liderin që lëviz në aksion të fortë, që përplaset dhe qëndron. Jo për t?i dhënë Bashës më shumë se sa i takon, por për të thënë të vërtetën, kreu i PD një javë çoi në çadër gazetarë, politikanë, ndërkombëtarë, provokoi dhe nxiti debat të fortë, detyroi dyshen qeverisëse të ulej menjëherë në karrige dhe t?i rikthehej darkës me ngjala për të zgjidhur pazaret e radhës.
Fitoret e Bashës janë një ?ushtrim? elektoral i mirë për PD, sepse kjo forcë politike, e cila po kalonte një problematikë të thellë në lidhje me organizimin e saj, tani duket se po i përgjigjet me sado pak forca qëndresës nga çdo cep i Shqipërisë.

Problemi i demokratëve nuk janë listat e deputetëve, as debatet e brendshme, për Bashën është një moment i artë, sepse lëvizja e tij po e konfiguron si lider të opozitës. Dhe për herë të parë duket se nuk po tërhiqet nga një rrugë që ka ngritur në këmbë demokratët dhe po mban në ankth dhe tension politikën në vend.

Një javë aktivitet politik në çadër ndoshta ka më shumë vlerë se 3 apo 4 vite opozitë e Lulzim Bashës dhe po zëvendësojnë lëvizjen dhe qëndresën e fortë të munguar nga ana e tij. Një javë aksion, ku edhe kritiku më i fortë i opozitës apo mbështetësi më i zjarrtë i Edi Ramës, nuk thotë dot se PD dhe Basha po gabojnë, sepse opozita në këtë rast dhe kryetari i saj kanë filluar të jenë në aksion dhe lëvizje, këto të fundit thjesht e bëjnë më të fortë opozitën në përballjet e saj. Shumë analistë e vlerësojnë, të tjerë e shohin me kosto në vijim, por të gjithë pranojnë një fakt: Kjo mund të quhet java e Lulzim Bashës. Lëvizja e tij e befasishme dhe qëndresa në çadër e kanë lënë gojë hapur dhe vetë mazhorancën, e cila përpiqet me çdo kusht të gjejë justifikime për aksionin opozitar. Justifikime, të cilat qeveria duhet t?i lërë dhe të ulet në tryezë me opozitën për të gjetur zgjidhje dhe garanci për zgjedhjet e lira. I pëlqen ose jo Edi Ramës rrugë tjetër nuk ka. Ai nuk e zgjedh dot kundërshtarin politik./CityNews