KLSH zbardh vjedhjen në Bankën e Shqipërisë/ Abuzimet me kartëmonedhat pa numër serial

18 Nëntor 2016, 09:07, Aktualitet CNA

Grabitja e 600 milionë lekëve në Bankën e Shqipërisë, e cila u zbulua në vitin 2014, mund të mos jetë e vetmja. Dyshimet se abuzime të tjera mund të jenë kryer nga punonjës të BSH në vitet 2010-2014 lindin nga një raport i Kontrollit të Lartë të Shtetit, i cili ka nxjerrë në pah një sërë problematikash në lidhje me procedurat e kontrollit mbi paranë, në Departamentin e Emisionit, ose siç njihet ndryshe Thesari i Bankës së Shqipërisë.

KLSH i referohet konstatimeve të auditimit të realizuar me objekt ?Auditimin e përputhshmërisë së administrimit të fondeve logjistike në Departamentin e Emisionit me kuadrin rregullator në fuqi?, për periudhën 01.01.2010 deri më 31.07.2014, si dhe vlerësimit të raportit përfundimtar dhe të dhënave të paraqitura nga shoqëria audituese ?K A? Shpk, e kontraktuar për auditimin e pasqyrave financiare të mbylljes së aktivitetit ekonomiko-financiar të Bankës së Shqipërisë për vitin 2015, shkruan Gazeta “Sot”.

Problematika

Sipas raportit të hartuar nga specialistët e KLSH, në Departamentin e Emisionit mungon një sistem i kompjuterizuar regjistrimi për paratë dhe përdorimi gjerësisht i formateve në Excel, për të mbajtur regjistrime të parave në arkat për veprim dhe stok. Një tjetër problem i konstatuar gjatë auditit, janë dhe kartëmonedhat e emetuara më parë që më pas janë rikthyer në arkë dhe janë paketuar nga punonjësit e Bankës. Sipas KLSH, këto kartëmonedha mbajnë etiketa vetëm me datën e paketimit, por pa një numër serial identifikimi, duke reflektuar një risk të lartë për t?u monitoruar gjatë këtij procesi. Në Departamentin e Emisionit është vënë re gjithashtu se nuk ka praktika të njëjta lidhur me kufirin maksimal për gjendjen e parave të mbajtura në arkën qendrore për veprim, dhe për paratë e mbajtura nga degët. Po ashtu, ka nja nivel të lartë kartëmonedhash të paemetuara, të cilat janë printuar në vitet e mëparshme.

Sipas KLSH-së, përafërsisht 43% të gjendjes aktuale, i takon kartëmonedhave të printuara midis viteve 2007 dhe 2012. Ndërkohë, është evidentuar mungesa e kontrolleve të përshtatshme mbi gjendjen e parasë dhe qarkullimin e saj, si dhe e një metodologjie të mirëpërcaktuar në lidhje me këtë qarkullim, duke reflektuar rrezikun e qarkullimit të ulët të kartëmonedhave dhe duke ekspozuar bankën ndaj një rreziku më të madh të përvetësimit. Kushtet fizike të arkave janë vlerësuar jo të përshtatshme, që mund të dëmtojë aftësinë e personelit për të kryer procedura kontrolli në kohë e të përshtatshme dhe kontrolle të vazhdueshme mbi gjendjen e parave të mbajtura në këto vendndodhje.

Kontrolli i Lartë i Shtetit druhet gjithashtu se mungesa e procedurave të rotacionit të detyrueshëm të personelit përgjegjës për vlerat monetare rrit rrezikun e bashkëpunimit në mashtrim që rrjedh nga një numër i vogël i punonjësve të përfshirë në proces.

Rekomandimet

Nisur nga gjithë problematika e konstatuar në Departamentin e Emisionit, KLSH ka rekomanduar që në iniciativën ligjore të iniciuar të vlerësohet kërkesa për ndryshimeve në plotësimin e nenit 40 të Ligjit nr.8269, datë 23.12.1997 ?Për Bankën e Shqipërisë?, lidhur me kontrollin mbi paranë, plotësime të cilat duhet të gërshetojnë në mënyrë efektive jo vetëm praktikat bazuar në rregullat që normojnë këtë proces në Bankën Qendrore Evropiane dhe vendeve të Eurozonë por edhe kontekstin, kulturën dhe sistemet mbi të cilën realizohet ky proces në Shqipëri. /Citynews