Ja ku po pushojnë politikanët shqiptarë/Nga Dhërmiu e Jala deri në Sardenjë…

14 Gusht 2016, 07:59, Aktualitet CNA

Dhërmiu, Jala, Lalzi, Shëngjini, Pogradeci dhe Korça, duket se janë vendet ku po pushojnë pjesa më e madhe e politikanëve shqiptarë.

Kryeministri Edi Rama ka zgjedhur pushimet në vilën qeveritare në Dhërmi, ku prej pothuajse dy javësh ndodhet me familjen e tij. Hera herës Rama poston foto në rrjetet sociale, ndërsa sikundër mësohet ai pothuajse ka lëvizur në të gjithë bregdetin në Jug të vendit. Por në Dhërmi janë stacionuar edhe disa nga ministrat, të cilët kanë preferuar të njëjtën zonë, ashtu si edhe Kryeministri për të pushuar.

Ministrat Blendi Klosi, Bled Cuci, Ylli Manjani, Damian Gjiknuri, Arben Ahmetaj, Mirela Kumbaro dhe Milena Harito kanë shprëndarë foto duke pushuar në Dhërmi. Ndërsa ministrja e Mbrojtjes, Mimi Kodheli, ka zgjedhur Jalën, atje ku ndodhet edhe shtëpia e pushimit të Ministrisë së Mbrojtjes.

Ndërkohë sikundër mësohet Kryetari i Kuvendit Ilir Meta po pushon mes Gjirit të Lalzit ku ka një rezidencë private, por edhe në Shëngjin, ku duket se ishte i ftuari i deputetit Gjovalin Kadeli.

Pogradeci dhe Korça janë dy destinacione të tjera ku janë akomoduar politikanët shqiptarë, por duket se këto dy destincionejanë përzgjedhur nga ata që i përkasin një moshe më të madhe. Duket se kjo kategori ka përzgjedhur freskinë e klimës dhe jo detin.

Por disa prej ligjvënësve dhe zyrtarëve të tjerë, kanë zgjedhur pushimet apo udhëtimet jashtë vendit. Deputeti Fatmir Toçi ka shpërndarë foto në rrjetet sociale duke pushuar në ishullin San Pietro në Sardenjë, ndërsa kolegia e tij deputete Mesila Doda, bashkë me familjen duket se ka ndërmarrë një tur udhëtimesh, të paktën nga ato që publikohen në rrjetet sociale.

Mimoza Hafizi është në Milano, por më shumë sesa pushime, deputetja duket se është angazhuar në një studim.

Ndërkohë ministrat Ilir Beqaj dhe Sajmir Tahiri duket se nuk kanë një vend ku janë stacionuar. Beqaj shfaqet hera herës duke inspektuar qendrat shëndetësore të hapura përgjatë zonave turistike, ndërsa Tahiri është akuzuar nga opozita se ka bërë një udhëtim të dyshimtë drejt Barit të Italisë.

Por ajo që mësohet është se ministri i Brendshëm do të jetë i pranishëm në javën e fundit të Gushtit në Jalë, atje ku do të ngrihen kampingjet e FRESSH dhe LRI-së, të rinjve të dy partive kryesore të koalicionit qeveritar. /citynews/