Rama-Meta, beteja zbret në bazë/Të gjithë kundër Shukriut të dytë

12 Gusht 2016, 16:33, Aktualitet CNA

Partia Demokratike me zyrtarizimin e Sherefedin Shehut për postin e Kryebashkiakut të Peshkopisë në zgjedhjet që do të mbahen më 11 Shtator duket se ka bërë një lëvizje brilante duke zënë ngushtë mazhorancën. Kjo për faktin se deputeti demokrat konsiderohet një nga zërat më seriozë të opozitës, madje ky vlerësim bëhet edhe nga më të ashprit në rradhët e mazhorancës kundër PD-së.

Përballë një figure kombëtare sikundër është ajo e deputeti Shehu, me një karrierë të gjatë akademike dhe politike, Partia Socialiste ka vendosur të kandidojë Dionis Ymeraj, i cili mban detyrën e Drejtorit të Tatimeve në bashkinë e Peshkopisë. Por pavarësisht reputacionit që mund të ketë Ymeraj në këtë Bashki, ai mbetet një figurë lokale, e cila nuk mund të mbajë mbi shpatulla skandalin për të cilin Shukri Xhelili, ish-Kryebashkiaku i Peshkopisë, u shkarkua nga detyra.

Veç këtij fakti, duket se socialistët në betejën e 11 shtatorit për Bashkinë e Peshkopisë, do të jenë të vetëm, përballë jo vetëm një kandidati shumë serioz të përzgjedhur nga PD, por edhe për koalicionin e gjerë, të deklaruar ose jo, që do të mbështesë në këtë garë Sherefedin Shehun.

Nga Partia Socialiste, zgjedhjet në Bashkinë e Peshkopisë konsideron si një test për funksionimin e koalicionit, por edhe aleancës me LSI-në. Në anën tjetër, Ilir Meta, ka deklaruar se vendimi për zgjedhjet e 11 Shtatorit është tërësisht lokal, duke ia lënë degës së LSI në këtë qytet vendimin për të mbështetur apo jo, një kandidaturë të propozuar nga PS. Po kështu, LSI duket se ka një arsye për të mos u angazhuar dhe për të mos mbështetur kandidatin e PS-së, për vetë faktin se ata e kanë kundërshtuar atë në pozicionin e Drejtorit të Tatimeve. Madje ai është cilësuar si Shukriu dytë nga aleati i PS-së në qeverisje.

Po kështu janë të njohura përplasjet mes dy deputetëve të mazhorancës, Përparim Spahiu (LSI) dhe Ulsi Manja (PS) kryesisht përsa i takon influencës në emërimet në Qarkun e Dibrës, por edhe për shkak të tensioneve që zbresin nga majat e dy forcave politike që prej 3 vitesh ndodhen në të njëjtin koalicion. Sikundër mësohet, Manja si deputeti socialist më me influencë në Qarkun e Dibrës, ka punuar vazhdimisht për të minimizuar peshën e LSI-së në këtë qark, duke vendosur veton në jo pak raste propozimesh nga forca politike në aleancë. Në anën tjetër, ligjvënësi i LSI-së Spahiu nuk ka nguruar t?i kundërvihet çdo propozimi të bërë nga PS për poste drejtuese në administratën lokale në këtë qark, ku ndër emrat e kontestuar është edhe kandidatura e PS-së për Bashkinë e Peshkopisë.

Pra me pak fjalë, Dionis Ymeraj, i përzgjedhur duket nga deputeti Ulsi Manja, do t?i duhet të përballet me një fushatë ku në krah do të ketë vetëm forcën politike që e ka propozuar, çka do të thotë se përballë nuk do të ketë vetëm një nga figurat më serioze të opozitës, as një koalicion të gjerë partish, por një koalicion të gjerë qytetarësh.

/citynews/