Kur do e sulmojë Basha, Ilir Metën?

24 Korrik 2016, 10:40, Aktualitet CNA

Prej disa kohësh Partia Demokratike zyrtarisht ka stopuar çdo akuzë apo sulm ndaj LSI-së dhe Ilir Metës. Në reagimet zyrtare kujdeset që të bëjë një ndarje të qartë mes Kryeministrit Edi Rama dhe PS-së në njërën anë, dhe LSI dhe Ilir Metës në anën tjetër.

Megjithëse prej 3 vitesh PS dhe LSI bëjnë pjesë në një koalicion, bashkëqeverisin vendin dhe kanë të njëjtat përgjegjësi për dështimet, zyrtarisht PD e cilëson qeverinë Rama-Meta, thjesht si Qeverinë e kreut të PS-së, edhe pse në të janë të paktën 5 ministra nga LSI.

Forca politike e drejtuar nga Ilir Meta nëse do t?i referohesh çdo skandali që ka përfshirë qeverinë e tij dhe të Ramës, jo vetëm që nuk është distancuar, por nuk ka reaguar as kur denoncimet janë bërë nga opozita.

Kaq mjafton që mes Kryeministrit dhe Kryetarit të Kuvendit mos të vendoset një vijë ndarëse. Por duket se Kreu i PD-së ka kohë që ka vendosur një ndarje të tillë duke përqëndruar të gjitha bateritë tek Kryeministri dhe ministri i Brendshëm, dhe duke lënë në hije LSI-në, ministrat e saj, përfshi këtu edhe Kryeparlamentarin.

Madje PD zyrtare ka shkuar edhe më tej kur nuk mbahet mend sesa kohë mund të ketë kaluar që nga momenti kur është artikuluar qoftë edhe një akuzë për ndonjë nga ministrat e LSI-së, edhe pse ato mbajnë poste të rëndësishme në qeveri që nisin me Mjedisin, dhe vijojnë me Bujqësinë, Drejtësinë, Integrimin dhe Transportet.

Rati më evident është ai i konçensionit për Rrugën e Kombit, kur PD heshti, edhe pse kostot bien mbi qytetarët. Nga selia e PD-së, zyrtarisht nuk ka asnjë reagim për tenderin e zhvilluar nga Ministria e Transporteve që drejtohet nga Edmond Haxhinasto.

Në anën tjetër edhe për skandalet e denoncuara në media, duket se Basha në drejtimin e PD-së, ka përdorur dy standarde, ku sa herë që mediat kanë përfolur emrin e Kryeparlamentarit Meta, opozita zyrtare është përpjekur që shigjetat t?i drejtojë drejt Kryeministrit.

Këtu nuk do të kishte asnjë gjë të keqe nëse sulmi politik do të zhvillohej ndaj dy drejtuesve të koalicionit, por fakti që ka një përpjekje për të bindur opinionin publik se Rama dhe Meta janë të ndryshëm, rëndon pozitat e PD-së zyrtare.

Ndoshta ky përbën edhe një rast unikal në Botë sesi një opozitë mund të pretendojë të vijë në pushtet kur gjysmën e Qeverisë mundohet ta mbajë larg skandaleve, ndërsa përpiqet që të keqen ta identifikojë vetëm në gjysmën tjetër. /citynews/