Llogaritë e numrave në Kuvend, Rama nuk i ka 71 vota

18 Korrik 2016, 11:01, Aktualitet CNA

Kryeministri Edi Rama rezulton se nuk i ka 71 votat në Kuvend, me të cilat mund të qeverisë vendin, me daljen e LSI nga koalicioni qeveritar. Megjithëse burime nga Partia Socialiste shprehen se nga llogaritë e bëra, Rama ka të sigurta 73 apo 74 vota, duket se situate nuk është në favor të Ramës.

Referuar burimeve, llogaritë e bëra në Partinë Socialiste bazohen tek 63 ligjvënësit e PS-së, 5 të PDIU-së, votat e deputetëve Agron Duka dhe Nard Ndoka, si dhe 2-3 deputetëve nga LSI. Burimet shprehen se në llogaritjet e bër nga Rama të 5 deputetët e PDIU-së do të votojnë në rrjesht pro Qeverisë, duke prnuar ofertat për poste qeveritare.

Por Citynews pas këtyre informacioneve ka nisur investigimet duke marrë të mirëqënë llogaritë e bëra nga Rama apo PS mbi numrin e votave në Kuvend.

Burimet i thanë Citynews se deputeti Ben Blushi nuk ka pranuar ofertën për të qenë ministër, por i ka kërkuar Edi Ramës të deklarojë publikisht se do të pranojë zgjedhjet në Partinë Socialiste. Referuar burimeve, Blushi dhe Mimoza Hafizi, vështirë se do të votojnë një qeveri të Rilindjes.

Nga ana tjetër mësohet se edhe me deputetin Agron Duka ka pasur negociata dhe oferta, por ligjvënësi që sot drejton Partinë Agrare Ambientaliste, ka refuzuar mbështetjen e Qeverisë. Po kështu deputeti Nard Ndoka, Kryetar i PDK-së, me frymën e krijuar do ta ketë të vështirë të mbështesë një qeveri të Ramës apo Rilindjes.

Në llogaritjet e bëra nuk përfshihen votat e Lad Kostës dhe Mira Shehut, i pari i larguar nga PS vetëm një javë më parë përmes një letre të hapur të mbushur me akuza ndaj Edi Ramës, ndërsa deputetja Shehu njihet si mbështetëse e Kokëdhimës, çka do të thotë se edhe ajo nuk voton një qeveri të tillë.

Pra në bazë të këtyre llogaritjeve, nëse PS pretendon se ka mbështetjen e 73 deputetëve në Kuvend, pot i zbresim këtu deputetët Blushi, Hafizi, Kosta, Shehu, Duka, Ndoka, si dhe ndonjë votë të PDIU-së, mbështetja reduktohet në 66 vota, të pamjaftueshme për të mbajtur në këmbë Qeverinë Rama.

Por duhet pritur deri në fund, pasi në Kuvendin e Shqipërisë ka deputetë të cilët mund të lëvizin deri në sekondën e fundit. Praktikat parlamentare dhe politike në Shqipëri kanë treguar se në raste të tilla krizash, janë gjetur deputetët që kanë shpëtuar mazhorancat e reduktuara, madje edhe në vitet e fundit.

Ndaj duhet pritur pasi votat në sallën e Kuvendit mund të blihen e shiten si mollët në pazarin e Korçës apo pjeshkat e Rilindjes. /citynews/